ସଂଚାର ବ୍ୟୁରୋ: ବଜ୍ର ନେଉଛି ଜୀବନ। ଆଜି ପୁଣି ରାଜ୍ୟର ବିଭିନ୍ନ ସ୍ଥାନରେ ବଜ୍ରାଘାତ ଯୋଗୁଁ ୪ ଜଣଙ୍କ ମୃତ୍ୟୁ ହୋଇଛି । ଭଦ୍ରକ ଜିଲ୍ଲା ଭଣ୍ଡାରିପୋଖରୀ ବ୍ଲକ ନେରଡ଼ା ଗ୍ରାମର ଚାଷୀ ସୁଜିତ କୁମାର ନାୟକ ଜମିକୁ କାମ କରିବାକୁ ଯାଇଥିବାବେଳେ ବଜ୍ରାଘାତରେ ମୃତ୍ୟୁ ହୋଇଛି । କାମ କରୁଥିବା ଅନ୍ୟ ଚାଷୀ ତାଙ୍କୁ ଭଣ୍ଡାରିପୋଖରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ ସୁଦ୍ଧା ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ ।
ସୁବର୍ଣ୍ଣପୁର ଜିଲ୍ଲା ବିନିକା ବ୍ଳକ ବାବୁପାଲି ପଞ୍ଚାୟତ ତିଲେଇମାଲ ଗାଁରେ ବଜ୍ରପାତ ଯୋଗୁଁ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଯାଇଛି । ମୃତକ ହେଲେ ତିଲେଇମାଲ ଗାଁର ହିମାଂଶୁ ମହାନନ୍ଦ । ଧାନ ରୁଆ କାର୍ଯ୍ୟ ପାଇଁ ଧାନବିଲକୁ ଯାଇଥିବାବେଳେ ବଜ୍ରାଘାତ ହୋଇଥିଲା । ଶ୍ରମିକମାନେ ଆମ୍ବୁଲାନ୍ସ ଯୋଗେ ବିନିକା ଡାକ୍ତରଖାନାକୁ ନେଇଥିଲେ ସୁଦ୍ଧା ମୃତ ଘୋଷଣା କରିଥିଲେ ଡାକ୍ତର ।
ସେହିପରେ ଯାଜପୁର ଜିଲ୍ଲାରେ ବଜ୍ରାଘାତ ଯୋଗୁଁ ଦୁଇଜଣଙ୍କ ଜୀବନ ଯାଇଛି । ଧର୍ମଶାଳା ବ୍ଳକ ଭବାନୀପୁର ପଞ୍ଚାୟତରେ ବଜ୍ରପାତରେ ଜଣେ ଚାଷୀଙ୍କ ମୃତ୍ୟୁ ଘଟିଛି l ମୃତକ ହେଲେ ରମାକାନ୍ତ ସାହୁ । କୋରେଇ ଥାନା ଆଲଡା ଜଳସରପୁର ଗ୍ରାମରେ ବଜ୍ରାଘାତରେ ଜଣେ ଚାଷୀଙ୍କ ମୃତ୍ୟୁ ହୋଇଥିବା ବେଳେ, ଅନ୍ୟ ଜଣେ ଗୁରୁତର ଆହାତ ହୋଇଛନ୍ତି । ମୃତକ ସେହି ଗ୍ରାମର ରାଜେନ୍ଦ୍ର ମଲିକ । ଗୁରୁତର ନିରଞ୍ଜନ ମଲିକଙ୍କୁ କୋରେଇ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।
