ବାତ୍ୟାକୁ ନେଇ ଗଜପତି ଜିଲ୍ଲାରୁ ଆସିଲା ୫ ବଡ଼ ଅପଡେଟ । ବାତ୍ୟା ‘ଅକଭାନ୍’ ପ୍ରଭାବରେ ଗଜପତିକୁ ଭୂସ୍ଖଳନ ଭୟ, ପାହାଡ଼ିଆ ଅଞ୍ଚଳରେ ହାଇଆଲର୍ଟ । ଗଜପତିରେ ୨୧୧ ଭୂସ୍ଖଳନପ୍ରବଣ ସ୍ଥାନ ଚିହ୍ନଟ । ମହେନ୍ଦ୍ରଗିରି ଓ ଜଳପ୍ରପାତରେ ପର୍ଯ୍ୟଟକଙ୍କୁ କଟକଣା ।
୧. ଲ୍ୟାଣ୍ଡଫଲ୍ ବେଳେ ଗଜପତିରେ ପ୍ରବଳ ବର୍ଷା ଆଶଙ୍କା। ବାତ୍ୟା ‘ଅକଭାନ୍’ ଗୋପାଳପୁର ନିକଟରେ ସ୍ଥଳଭାଗ ଅତିକ୍ରମ କରିଛି । ଏପଟେ ଗଜପତି ଜିଲ୍ଲା ପାଇଁ ବର୍ଷାଜନିତ ବିପଦ ବଢ଼ିଛି । ବାତ୍ୟାର ପ୍ରଭାବରେ ପାରଳାଖେମୁଣ୍ଡି, ମୋହନା, ଆର୍. ଉଦୟଗିରି, ନୂଆଗଡ଼ ଓ ରାୟଗଡ଼ ବ୍ଲକ୍ ର ପାହାଡ଼ିଆ ଅଞ୍ଚଳରେ ପ୍ରବଳ ବର୍ଷା ହେବାର ଆଶଙ୍କା ରହିଛି । ବିଶେଷକରି ପାହାଡ଼ ଢାଲୁ ଅଞ୍ଚଳ ଓ ନଦୀନାଳ ନିକଟରେ ରହୁଥିବା ଲୋକଙ୍କ ପାଇଁ ସତର୍କତା ଜରୁରୀ ।
୨. ଗଜପତିରେ ୨୧୧ ଭୂସ୍ଖଳନପ୍ରବଣ ସ୍ଥାନ ଚିହ୍ନଟ । ବାତ୍ୟା ପାଇଁ ଗଜପତିର ସବୁଠାରୁ ବଡ଼ ଚିନ୍ତା ଭୂସ୍ଖଳନ। ଦକ୍ଷିଣ ଓଡ଼ିଶାର ପାଞ୍ଚଟି ଜିଲ୍ଲାରେ ମୋଟ ୯୪୧ଟି ଭୂସ୍ଖଳନପ୍ରବଣ ସ୍ଥାନ ଚିହ୍ନଟ ହୋଇଛି । ସେଥିମଧ୍ୟରୁ ଗଜପତିରେ ସର୍ବାଧିକ ୨୧୧ଟି ସ୍ଥାନ ରହିଛି । ଲଗାଣ ବର୍ଷା ହେଲେ ପାହାଡ଼ରୁ ପଥର ଓ ମାଟି ଖସି ରାସ୍ତା ଅବରୋଧ ହେବାର ଆଶଙ୍କା ରହିଛି ।
୩. ମହେନ୍ଦ୍ରଗିରି ଓ ଜଳପ୍ରପାତରେ ପର୍ଯ୍ୟଟକଙ୍କୁ କଟକଣା । ବାତ୍ୟା ସତର୍କତାକୁ ଦୃଷ୍ଟିରେ ରଖି ଗଜପତି ଜିଲ୍ଲା ପ୍ରଶାସନ ମହେନ୍ଦ୍ରଗିରି ପାହାଡ଼, ଜଳପ୍ରପାତ ଓ ବିଭିନ୍ନ ପିକ୍ ନିକ୍ ସ୍ଥଳୀକୁ ସାମୟିକ ଭାବେ ବନ୍ଦ ରଖିଛି । ବର୍ଷା ସମୟରେ ପାହାଡ଼ିଆ ରାସ୍ତା ଧସିବା , ପଥର ଖସିବା ଓ ଝରଣାରେ ହଠାତ୍ ପାଣି ବଢ଼ିବା ଭଳି ବିପଦକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି । ପାଣିପାଗ ସତର୍କତା ପ୍ରତ୍ୟାହାର ଏବଂ ସ୍ଥାନ ସୁରକ୍ଷିତ ଘୋଷଣା ହେବା ପର୍ଯ୍ୟନ୍ତ କଟକଣା ଜାରି ରହିବ ।
୪. ମୋହନାର ମାଧପଙ୍କା ଗାଁରୁ ୧୯ ଜଣଙ୍କୁ ଉଦ୍ଧାର । ଗଜପତିର ମୋହନା ବ୍ଲକର ଦୁର୍ଗମ ମାଧପଙ୍କା ଗାଁରୁ ୧୯ ଜଣଙ୍କୁ ସୁରକ୍ଷିତ ସ୍ଥାନକୁ ନିଆଯାଇଛି । ଉଦ୍ଧାର ହୋଇଥିବା ଲୋକଙ୍କ ମଧ୍ୟରେ ମହିଳା, ଶିଶୁ ଓ ଜଣେ ଗର୍ଭବତୀ ମହିଳା ମଧ୍ୟ ଅଛନ୍ତି। ଜିଲ୍ଲା ପ୍ରଶାସନ ଓ ଓଡ୍ରାଫ୍ ଟିମ୍ ର ସହାୟତାରେ ଏହି ସ୍ଥାନାନ୍ତର କରାଯାଇଥିବା ରିପୋର୍ଟ ରହିଛି । ପାହାଡ଼ିଆ ଓ ଦୁର୍ଗମ ଗାଁଗୁଡ଼ିକରେ ବାତ୍ୟା ସମୟରେ ଯୋଗାଯୋଗ ବିଚ୍ଛିନ୍ନ ହେବାର ଆଶଙ୍କା ଥିବାରୁ ଆଗୁଆ ସତର୍କତାକୁ ଗୁରୁତ୍ୱ ଦିଆଯାଇଛି ।
୫. ଗଜପତିରେ ୫୧୮ ଆଶ୍ରୟସ୍ଥଳୀ, ରାସ୍ତା ସଫା ପାଇଁ ୧୫୦ ମେସିନ୍ । ବାତ୍ୟା ମୁକାବିଲା ପାଇଁ ଗଜପତି ଜିଲ୍ଲାରେ ୫୧୮ଟି ଆଶ୍ରୟସ୍ଥଳୀ ପ୍ରସ୍ତୁତ ରଖାଯାଇଛି । ବର୍ତ୍ତମାନ ସୁଦ୍ଧା ଜିଲ୍ଲାର ପ୍ରାୟ ୨୦ ହଜାର ଲୋକଙ୍କୁ ସ୍ଥାନାନ୍ତର କରାଯାଇଥିବା ପ୍ରଶାସନ ପକ୍ଷରୁ କୁହାଯାଇଛି । ଜରୁରୀ ପରିସ୍ଥିତି ପାଇଁ ଗୋଟିଏ ଏନ୍ ଡିଆର୍ ଏଫ୍, ୬ଟି ଓଡ୍ରାଫ୍ ଏବଂ ୧୧ଟି ଅଗ୍ନିଶମ ଟିମ୍ ପ୍ରସ୍ତୁତ ରହିଛନ୍ତି । ଭୂସ୍ଖଳନରେ ରାସ୍ତା ଅବରୋଧ ହେଲେ ତୁରନ୍ତ ସଫା କରିବାକୁ ପ୍ରାୟ ୧୫୦ଟି ଭାରୀ ମେସିନ୍ ମୁତୟନ କରାଯାଇଛି ।



