ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବଢ଼ି ଚାଲିଥିବା ବେଳେ ଅନେକ ଡାହ ମିଛ କଥା କହି ଚାଲିଛନ୍ତି ପାକିସ୍ତାନ ସରକାର । ଆମେ ଭାରତର ଡ୍ରୋନକୁ ମାରି ଖସାଇ ଦେଇଛୁ, ଭାରତ ଆମ ସହର ଉପରକୁ ଡ୍ରୋନ୍ ଆକ୍ରମଣ କରୁଛି, ଏମିତି ଅନେକ କଥା କହୁଛି । ହେଲେ ଏସବୁ ଭିତରେ ପାକିସ୍ତାନୀମାନେ ବିଶେଷ ଭାବେ ଭାରତ ବିଷୟରେ ଗୁଗୁଲ ସର୍ଚ୍ଚ ଚଳାଇଛନ୍ତି ।
ଅପରେସନ୍ ସିନ୍ଦୂର ପରେ ସିନ୍ଦୂର କଣ ଜାଣିବାକୁ ଖୁବ୍ ସର୍ଚ୍ଚ କରିଥିଲେ । ଏବେ କର୍ଣ୍ଣେଲ ସୋଫିଆ କ୍ୟୁରେସିଙ୍କ ବିଷୟରେ ଜାଣିବାକୁ ଭାରି ଉତ୍କଣ୍ଠା ଦେଖାଉଛନ୍ତି ପାକ୍ ବାସିନ୍ଦା । ଅପରେସନ୍ ସିନ୍ଦୂର ପରେ ଭାରତୀୟ ସେନା ପକ୍ଷରୁ ହୋଇଥିବା ସାମ୍ବାଦିକ ସମ୍ମିଳନୀରେ ଦୁଇ ଜଣ ମହିଳା ଅଧିକାରୀ ସୂଚନା ଦେଇଥିଲେ । ଜଣେ ହେଉଛନ୍ତି କର୍ଣ୍ଣେଲ ସୋଫିଆ କ୍ୟୁରେସି ଏବଂ ଆଉ ଜଣେ ୱିଙ୍ଗ କମାଣ୍ଡର ଭ୍ୟୋମିକା ସିଂହ । ତେବେ ସୋଫିଆ ମୁସଲମାନ ସମ୍ପ୍ରଦାୟର ବୋଲି ମନେ କରି ତାଙ୍କୁ ବିଶେଷ ଭାବେ ସର୍ଚ୍ଚ କରିଛନ୍ତି ପାକିସ୍ତାନୀ । ସୋଫିଆ କିଏ ଓ ତାଙ୍କ ଧର୍ମ କଣ ? ଏମିତି ଅନେକ ପ୍ରଶ୍ନ ରହିଛି ଗୁଗୁଲ୍ ସର୍ଚ୍ଚରେ ।
ଏହା ବ୍ୟତୀତ ଭାରତର ଷ୍ଟକ ମାର୍କେଟ୍ ସ୍ଥିତି, ଭାରତ-ପାକିସ୍ତାନ ଯୁଦ୍ଧ, ପାକିସ୍ତାନର ସେନା ଆକ୍ଟ, ବିଶ୍ବର ଶ୍ରେଷ୍ଠ ୧୦ଟି ବାୟୁସେନା କିଏ, ଭାରତର ସେନା ମୁଖ୍ୟ କିଏ ଏବଂ ଅପରେସନ୍ ସିନ୍ଦୂରରେ କେତେ ଜଣ ମରିଛନ୍ତି ସେକଥା ମଧ୍ୟ ଜାଣିବାକୁ ଚାହିଁଛନ୍ତି ପାକିସ୍ତାନ ବାସିନ୍ଦା ।
ପୂର୍ବରୁ ସେମାନେ ସିନ୍ଦୂର କଣ ଓ ଏହା କଣ ପାଇଁ ବ୍ୟବହାର ହୁଏ ସେ ବିଷୟରେ ସର୍ଚ୍ଚ କରୁଥିଲେ । ପରେ ରାଫେଲର ଦାମ କେତେ ସେ କଥା ମଧ୍ୟ ଗୁଗୁଲରେ ସର୍ଚ୍ଚ କରିଛନ୍ତି । ପୁଣି ଭାରତ ବିଷୟରେ ଅଧିକ କିଛି ଜାଣିବା ଲାଗି ଚେଷ୍ଟା କରିଛନ୍ତି ।
