ସଂଚାର ବ୍ୟୁରୋ: କଂଗ୍ରେସରେ ସାମିଲ ହେଲେ ରେସଲର ଭିନେଶ ଫୋଗଟ ଓ ବଜରଙ୍ଗ ପୁନିଆ। ହରିୟାଣା ବିଧାନସଭା ନିର୍ବାଚନରେ ଦୁଇ ହେଭିୱେଟ କଂଗ୍ରେସରୁ ପ୍ରାର୍ଥୀ ହେବେ। ଜୁଲାନା ଆସନ ଲାଗି ଭିନେଶ ଫୋଗଟ ପ୍ରାର୍ଥୀ ହେବା ସୂଚନା ମିଳିଛି। କିନ୍ତୁ ପୁନିଆ କେଉଁଠାରୁ ପ୍ରାର୍ଥୀ ହେବେ ସେ ନେଇ ସୂଚନା ମିଳିନାହିଁ। ଆଜି ଦିଲ୍ଲୀରେ କଂଗ୍ରେସ ନେତା ରାହୁଲ ଗାନ୍ଧିଙ୍କୁ ଭେଟିବା ସହ କଂଗ୍ରେସରେ ସାମିଲ ହୋଇଥିଲେ। ଗତବର୍ଷ ରେସଲର ଫେଡେରେସନର ପୂର୍ବତନ ସଭାପତି ବ୍ରିଜ ଭୂଷଣ ସିଂଙ୍କ ବିରୋଧରେ ଲଢେଇ କରି ଦେଶବ୍ଯାପୀ ଚର୍ଚ୍ଚାର କାରଣ ହୋଇଥିଲେ ଭିନେଶ ଓ ପୁନିଆ। ପ୍ଯାରିସ ଅଲିମ୍ପିକ୍ସରୁ ଭିନେଶ ଫୋଗଟ ଫେରିବା ପରେ ଭିନେଶ ହରିୟାଣାର ପୂର୍ବତନ ମୁଖ୍ଯମନ୍ତ୍ରୀ ଭୂପିନ୍ଦର ସିଂ ହୁଡାଙ୍କୁ ଭେଟିଥିଲେ। ସେତେବେଳେ ଭୂପିନ୍ଦର କହିଥିଲେ ଦଳରେ ଯିଏ ସାମିଲ ହେବାକୁ ଚାହିଁବେ ତାଙ୍କୁ ସ୍ବାଗତ କରାଯିବ। ସେ କହିଥିଲେ- ଜଣେ କ୍ରୀଡ଼ାବିତ କୌଣସି ନିର୍ଦ୍ଦିଷ୍ଟ ଦଳ ବା ରାଜ୍ଯରେ ସୀମିତ ନୁହନ୍ତି। ସେ ସମଗ୍ର ଦେଶର। ସେ କେଉଁ ଦଳରେ ମିଶିବେ ତାହା ତାଙ୍କ ଉପରେ ନିର୍ଭର କରେ। ପ୍ଯାରିସରୁ ଫେରିବା ପରେ ତାଙ୍କୁ ବହୁ କଂଗ୍ରେସ ନେତା ସ୍ବାଗତ କରିବା ଦେଖାଯାଇଥିଲା। ରୋହତକ ଏମପି ଦୀପେନ୍ଦର ହୁଡା ତାଙ୍କୁ ଏକ ହନୁମାନ ଗଦା ଉପହାର ଦେଇଥିଲେ। କିଛିଦିନ ତଳେ ଶିଙ୍ଘୁ ବର୍ଡରରେ ଚାଷୀ ଆନ୍ଦୋଳନରେ ସାମିଲ ହୋଇଥିଲେ ଭିନେଶ।
