ସଂଚାର ବ୍ୟୁରୋ: କୁସ୍ତି ଆଖଡ଼ାରେ କମାଲ କଲେ ଭିନେଶ ଫୋଗଟ । ପ୍ୟାରିସ ଅଲିମ୍ପିକ୍ସ କୁସ୍ତି କୁସ୍ତି ପ୍ରତିଯୋଗିତା ଫାଇନାଲରେ ପ୍ରବେଶ କରି ସେ ଇତିହାସ ରଚିଛନ୍ତି । ମହିଳା ୫୦ କିଲୋଗ୍ରାମ ଫ୍ରିଷ୍ଟାଇଲ୍ କୁସ୍ତିରେ ହ୍ୟାଟ୍ରିକ୍ ବିଜୟ ହାସଲ କରି ଭିନେଶ ଫାଇନାଲ୍ରେ ସ୍ଥାନ ସୁରକ୍ଷିତ କରିବା ସହ ପଦକ ପକ୍କା କରିଛନ୍ତି । ଏଭଳି ବିରଳ ସଫଳତା ଲାଭ କରିବାରେ ପ୍ରଥମ ଭାରତୀୟ ମହିଳା ପହିଲମାନ ହୋଇଛନ୍ତି ଭିନେଶ । ଗତକାଲି ଭିନେଶଙ୍କ ଫାଇନାଲ୍ ଅଭିଯାନ ବେଶ୍ ନାଟକୀୟ ଓ ରୋମାଞ୍ଚକର ଥିଲା । ନିଜ କ୍ଯାରିଅରର ତୃତୀୟ ଅଲିମ୍ପିକ୍ସ ଖେଳୁଥିବା ଭିନେଶ ୫୦ କିଲୋଗ୍ରାମ ଫ୍ରିଷ୍ଟାଇଲ୍ କୁସ୍ତିର ପ୍ରଥମ ରାଉଣ୍ଡରେ ଟୋକିଓ ଅଲିମ୍ପିକ୍ସ ବିଜୟିନୀ ଜାପାନର ୟୁଇ ସୁସାକିଙ୍କୁ ୩-୨ ପଏଣ୍ଟରେ ପରାସ୍ତ କରିଥିଲେ । ଅନ୍ତର୍ଜାତୀୟ ଖେଳ ଜୀବନରେ କେବେ ବି ହାରି ନଥିବା ସୁସାକିଙ୍କୁ ହରାଇ ଇତିହାସ ରଚିଥିଲେ ଭିନେଶ । ପରେ ୟୁରୋପିଆନ୍ ଚାମ୍ପିଅନସିପ୍ ବିଜୟିନୀ ୟୁକ୍ରେନର ଓକସାନା ଲିଭାଚଙ୍କୁ ୭-୫ରେ ହରାଇ ସେମିଫାଇନାଲରେ ସ୍ଥାନ ସୁରକ୍ଷିତ କରି ନେଇଥିଲେ। ସେମିଫାଇନାଲରେ କ୍ୟୁବାର ୟୁସ୍ନିଲିସ୍ ଗଜମାନ୍ ଲୋପେଜଙ୍କୁ ୫-୦ରେ ଧରାଶାୟୀ କରି ପ୍ରଥମ ଥର ଫାଇନାଲ୍ରେ ପ୍ରବେଶ କରିବାର ଗୌରବ ହାସଲ କରିଛନ୍ତି ଭିନେଶ । ଫୋଗଟ ଫାଇନାଲରେ ସ୍ବର୍ଣ୍ଣ ଜିତିବାକୁ ଲକ୍ଷ୍ଯ ରଖିଥିବାବେଳେ ପରାସ୍ତ ହେଲେ ରୌପ୍ଯ ପଦକ ଜିତିବେ ।
