ସଂଚାର ବ୍ୟୁରୋ: ହାଣ୍ଡିଆ ପାଇଁ ସାଙ୍ଘାତିକ ନିଷ୍ପତ୍ତି। ଶୁଦ୍ଧିକ୍ରିୟାରେ ହାଣ୍ଡିଆ ଦେଲେ ନାହିଁ ବୋଲି ଗାଁରୁ ବାସନ୍ଦ। ଗୋଟିଏ ପରିବାରକୁ ଏକ ମାସ ହେବ ଗାଁରେ ନିଆଁ ପାଣି ବାସନ୍ଦ କରାଯାଇଛି। ମୟୂରଭଞ୍ଜ ଉଦଳା ଶରତ ଥାନା କେଶପାଳ ଗାଁରେ ଘଟିଛି ଏଭଳି ଘଟଣା । ଗ୍ରାମର ସାଗ୍ରାମ ସୋରେନଙ୍କ ବାପା ରାମ ସୋରେନଙ୍କର ଗତ ମାର୍ଚ୍ଚ ୧୭ ତାରିଖରେ ମୃତ୍ୟୁ ହୋଇଥିଲା। ବାପାଙ୍କ ଶୁଦ୍ଧିକ୍ରିୟା ସମୟରେ ହାଣ୍ଡିଆ ବ୍ୟବହାର କରିବାକୁ ନାରାଜ ହୋଇଥିଲେ ସାଗ୍ରାମ। ଯେଉଁଥିପାଇଁ ଗ୍ରାମବାସୀ ଶୁଦ୍ଧିକ୍ରିୟାରେ ସହଯୋଗ କରି ନ ଥିଲେ। ଶୁଦ୍ଧିକ୍ରିୟା ସରିବାର କିଛି ଦିନ ପରେ ଗ୍ରାମରେ ବୈଠକ ବସି ନିଆଗଲା ନିଷ୍ପତ୍ତି। ଶୁଦ୍ଧିକ୍ରିୟାରେ ହାଣ୍ଡିଆ ଦେଇ ନ ଥିବାରୁ ଦିଆଗଲା କଠୋର ଦଣ୍ଡ। ସାଗ୍ରାମଙ୍କ ପରିବାରକୁ କରାଗଲା ଗାଁରେ ନିଆଁ ପାଣି ବାସନ୍ଦ। ତାଙ୍କ ପରିବାର ସହ କେହି କଥା ହେଲେ କି ଘରକୁ ଗଲେ ସେ ଦୁଇ ହଜାର ଟଙ୍କା ଜୋରିମାନା ଦେବେ ବୋଲି ନିଷ୍ପତ୍ତି ହୋଇଛି। । ଏନେଇ ସାଗ୍ରାମ ଶରତ ଥାନାରେ ଲିଖିତ ଅଭିଯୋଗ କରିଥିଲେ ସୁଦ୍ଧା କୌଣସି ସୁଫଳ ନ ମିଳିବାରୁ ମୟୂରଭଞ୍ଜ ଏସପିଙ୍କୁ ଭେଟି ଘଟଣା ବାବଦରେ ଅବଗତ କରାଇଛନ୍ତି। ସେପଟେ ଗୋଟିଏ ପରିବାରର ୫ ପ୍ରାଣୀ କୁଟୁମ୍ବ କୁ ନିଆଁ ପାଣି ବାସନ୍ଦ ବାବଦରେ ଗାଁ ମୁଖିଆଙ୍କ ର ପ୍ରତିକ୍ରିୟା ନେବାକୁ ଚେଷ୍ଟା କରାଯାଇଥିବା ବେଳେ ସେ ଘଟଣା ବାବଦରେ କିଛି କହିବାକୁ ମନା କରିଦେଇଛନ୍ତି।…
