ସଂଚାର ବ୍ୟୁରୋ: ପାଖେଇ ଆସୁଛି ଉପରାଷ୍ଟ୍ରପତି ନିର୍ବାଚନ । ନା ଏନଡିଏ ନା ଇଣ୍ଡି ମେଣ୍ଟ ପକ୍ଷରୁ ପ୍ରାର୍ଥୀ ହେଲାଣି ଘୋଷଣା । ସେପଟେ ଆଜି ଚୂଡ଼ାନ୍ତ ହୋଇପାରେ ଏନଡିଏ ପ୍ରାର୍ଥୀଙ୍କ ନାଁ । ଆଜି ବସିବାକୁ ଥିବା ବିଜେପି ସଂସଦୀୟ ଦଳ ବୈଠକରେ ନାଁ ହୋଇପାରେ ଘୋଷଣା । ସଂସଦୀୟ ଦଳ ବୈଠକ ପୂର୍ବରୁ ଶୁକ୍ରବାର ବିଜେପି ସଭାପତି ଜେ.ପି. ନଡ୍ଡାଙ୍କ ବାସଭବନରେ ଏକାଠି ହୋଇଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଓ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ। ଦେଶର ଦ୍ବିତୀୟ ସାମ୍ବିଧାନିକ ମୁଖ୍ୟଙ୍କ ନାମ ଚୟନ କରିବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବିଜେପି ସଭାପତି ନଡ୍ଡାଙ୍କ ଉପରେ ଦାୟିତ୍ବ ନ୍ୟସ୍ତ କରିଥିଲା ଏନଡିଏ । ଏହି ଗୁରୁତ୍ବପୂର୍ଣ୍ଣ ବୈଠକରେ କିଛି ନାଁ ଚୟନ କରାଯାଇଥିବା ସୂଚନା ମିଳିଛି । ପୂର୍ବତନ ଉପରାଷ୍ଟ୍ରପତି ଭେଙ୍କୟାନାଇଡୁ, ଆରଏସଏସ ନେତା ଶେଷାଦ୍ରୀ ଚାରୀ ଓ କେତେକ ପୂର୍ବତନ ରାଜ୍ୟପାଳଙ୍କ ନାମକୁ ନେଇ ଏହି ବୈଠକରେ ଚର୍ଚ୍ଚା ହୋଇଥିବା ସୂଚନା ମିଳିଛି । ଗତ ଅଗଷ୍ଟ ୭ରେ ଉପରାଷ୍ଟ୍ରପତି ନିର୍ବାଚନ ଲାଗି ବିଜ୍ଞପ୍ତି ଜାରି ହୋଇଥିବାବେଳେ ଆସନ୍ତା ଅଗଷ୍ଟ ୨୧ ହେଉଛି ପ୍ରାର୍ଥିପତ୍ର ଦାଖଲର ଶେଷ ତାରିଖ । ଅଗଷ୍ଟ ୨୨ରେ ପ୍ରାର୍ଥିପତ୍ର ଯାଞ୍ଚ ହେବ । ଅଗଷ୍ଟ ୨୫ରେ ପ୍ରାର୍ଥିପତ୍ର ପ୍ରତ୍ୟାହାରର ଶେଷ ତାରିଖ ରହିଛି । ସେପ୍ଟେମ୍ବର ୯ରେ ହେବ ଭୋଟ ।
