ଟ୍ରମ୍ପଙ୍କ ଧମକ ଏବଂ ଟାରିଫ ଆକ୍ସନ ପରେ ରୁଷ ତୈଳ କିଣିବା ବନ୍ଦ କଲା କି ଭାରତ । ରୁଷଠାରୁ ତୈଳ କିଣୁଥିବାରୁ ଭାରତ ଉପରେ ୨୫ ପ୍ରତିଶତ ଟାରିଫ ସହ ପେନାଲ୍ଟି ଲଗାଇଥିଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଏବେ ଆମେରିକାର ରାଷ୍ଟ୍ରପତି କହିଛନ୍ତି, ମୁଁ ଶୁଣିବାକୁ ପାଉଛି ଏବେ ରୁଷିଆ ଠାରୁ ଭାରତ ତେଲ କିଣୁନାହିଁ । ଆଗକୁ କଣ ହେବ ତାହା ଦେଖିବା ବୋଲି ଟ୍ରମ୍ପ କହିଛନ୍ତି।
ତେବେ ମୁଁ ଯାହା ଶୁଣିଲି ଏହା ଠିକ୍ କି ଭୁଲ ଜାଣନି । ତେବେ ଏହା ଏକ ଭଲ ପଦକ୍ଷେପ । ଆମେରିକା ଏହାକୁ ସକରାତ୍ମକ ଭାବେ ଗ୍ରହଣ କରିବ ବୋଲି ଟ୍ରମ୍ପ କହିଛନ୍ତି । ବିଭିନ୍ନ ଆନ୍ତର୍ଜାତିକ ଗଣମାଧ୍ୟମରେ ଖବର ପ୍ରକାଶ ପାଇଛି, ଭାରତର ସରକାରୀ ରିଫାଇନାରୀଗୁଡିକ ଗତ ସପ୍ତାହ ଧରି ରୁଷ ତେଲ କିଣି ନାହାଁନ୍ତି ।
ଖବର ମୁତାବକ, ଇଣ୍ଡିଆ ଅଏଲ , ହିନ୍ଦୁସ୍ତାନ ପେଟ୍ରୋଲିୟମ, ଭାରତ ପେଟ୍ରୋଲିୟମ, ମାଙ୍ଗୋଲର ରିଫାଇନାରୀ ପେଟ୍ରୋକେମିକାଲ୍ସ ଆଦି କମ୍ପାନୀ ଗତ ସପ୍ତାହେ ହେଲା ରୁଷ ତେଲ କିଣି ନାହାଁନ୍ତି । କିନ୍ତୁ ତୈଳ କମ୍ପାନୀ କିମ୍ବା ସରକାରଙ୍କ ତରଫରୁ ଏ ସମ୍ପର୍କରେ କୌଣସି ବିଧିବଦ୍ଧ ସୂଚନା ଦିଆଯାଇ ନାହିଁ । ସମୁଦ୍ର ପଥ ଦେଇ ରୁଷଠାରୁ ଅଶୋଧିତ ତୈଳ କିଣିବାରେ ଭାରତ ସବୁଠାରୁ ବଡ଼ କ୍ରେତା । ୟୁକ୍ରେନ ଯୁଦ୍ଧ ସମୟରେ ରୁଷ ପାଇଁ ଏହା ବଡ଼ ରାଜସ୍ବ ଥିଲା। ରୁଷର ମୋଟ ତୈଳ ରପ୍ତାନୀର ୩୫ ପ୍ରତିଶତ ଭାରତକୁ ଆସୁଥିଲା । ରୁଷ ତେଲକୁ ନେଇ ଟ୍ରମ୍ପ ଭାରତକୁ ଟାରିଫ ଧମକ ଦେଇଥିଲେ । ଶେଷରେ ୨୫ ପ୍ରତିଶତ ଟାରିପ ସହ ପେନାଲ୍ଟି ଲଗାଇଥିଲେ ।
ଏବେ ଭାରତ ତେଲ କିଣିବା ବନ୍ଦ କରିଥିବା ଖବର ଆସିଛି । ସେପଟେ କୁହାଯାଉଛି ୨୦୨୨ରେ ଯୁଦ୍ଧ ଆରମ୍ଭ ପରେ ରୁଷ ତାର ତୈଳ ଉପରେ ଅଧିକ ରିହାତି ପ୍ରଦାନ କରୁଥିଲା । କିନ୍ତୁ ସେହି ରିହାତି ଏବେ ଧିରେଧିରେ ହ୍ରାସ ପାଉଛି । ତେଣୁ ଭାରତୀୟ କମ୍ପାନୀ ରୁଷ ତେଲ କିଣିବା କମାଇଛନ୍ତି । ରୁଷ ବଦଳରେ ମଧ୍ୟପ୍ରାଚ୍ୟ ଓ ପଶ୍ଚିମ ଆଫ୍ରିକାରୁ ତୈଳ କିଣିବା ଆରମ୍ଭ କରିଛନ୍ତି ।
