ସଂଚାର ବ୍ୟୁରୋ: କିଏ ହେବ ବିହାରର ପରବର୍ତ୍ତୀ ମୁଖ୍ଯମନ୍ତ୍ରୀ ? ଏ ପର୍ଯ୍ଯନ୍ତ ସ୍ପଷ୍ଟ ହୋଇନି ଏନଡିଏ ଚିତ୍ର। କାହା ପାଇଁ ହେବ ଶପଥ ଗ୍ରହଣ ଉତ୍ସବ? ହେଲେ ଆଜିଠୁ ଶପଥ ଗ୍ରହଣ ଉତ୍ସବ ପାଇଁ ସଜେଇ ହେଲାଣି ବିହାର ପାଟନା ସ୍ଥିତ ଗାନ୍ଧୀ ମଇଦାନ।ଆଗାମୀ ୨୦ ତାରିଖ ପର୍ଯ୍ଯନ୍ତ ଗାନ୍ଧୀ ମଇଦାନକୁ ସର୍ବସାଧାରଣଙ୍କ ଯିବା ଆସିବା ଉପରେ କଟକଣା ଲଗାଯାଇଛି। ମୁଖ୍ଯମନ୍ତ୍ରୀ ଓ ମନ୍ତ୍ରିମଣ୍ଡଳ ଶପଥ ଗ୍ରହଣ ଉତ୍ସବରେ ଯୋଗଦେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ କେନ୍ଦ୍ର ଗୃହମନ୍ତ୍ରୀ ଅମିତ ଶାହା। ହେଲେ କାହାକୁ କରାଯିବ ମୁଖ୍ଯମନ୍ତ୍ରୀ ? ଦିଲ୍ଲୀ ବିଜେପି ଶିବିରରେ ବସୁଛି ଘନ ଘନ ବୈଠକ।
ସେପଟେ ବିହାରରେ ମୁଖ୍ଯମନ୍ତ୍ରୀ ନୀତିଶ କୁମାରଙ୍କୁ ସାକ୍ଷାତ କରୁଛନ୍ତି କେନ୍ଦ୍ରମନ୍ତ୍ରୀ ଓ ବିଜେପି ନେତାଙ୍କ ସମେତ ଜେଡିୟୁର ମାଳ ମାଳ ନେତା। ହେଲେ ଛିଡ଼ିପାରୁନି ମୁଖ୍ଯମନ୍ତ୍ରୀ ଗଣିତ। ମୁଖ୍ଯମନ୍ତ୍ରୀ ନୀତିଶ କୁମାରଙ୍କ ନେତୃତ୍ବରେ ଏନଡିଏ ବିହାରରେ ୨୦୨ଟି ଆସନରେ ବହୁମତରେ ବିଜୟ ଲାଭ କରିଥିଲେ ବି ବିଜେପିକୁ ଏକାକି ମିଳିଛି ୮୯ଟି ଆସନ। ଏନଡିଏର ଅଂଶୀଦାର ଦଳ ଜେଡିୟୁକୁ ମିଳିଛି ୮୫, ଚିରାଗ ପାଶୱାନଙ୍କ ଦଳ ଲୋକ ଜନଶକ୍ତିପାର୍ଟିକୁ ୧୯, ଜିତିନରାମ ମାଞ୍ଝିଙ୍କ ଦଳ ହିନ୍ଦୁସ୍ତାନ ଆୱାମି ମୋର୍ଚ୍ଚା ସିକ୍ଯୁଲାର ବା ହାମସ ୫ଟି ଆସନରେ ବିଜୟ ଲାଭ କରିଥିବାବେଳେ ଉପେନ୍ଦ୍ର କୁଶୁୱାହାଙ୍କ ଦଳ ରାଷ୍ଟ୍ରୀୟ ଲୋକ ମୋର୍ଚ୍ଚା ୪ଟି ଆସନରେ ବିଜୟ ଲାଭ କରିଛି।
ଗତକାଲି ନିର୍ବାଚନ କମିଶନଙ୍କ ଅଧିକାରୀ ବିହାର ରାଜଭବନ ଯାଇ ବିହାରର ନିର୍ବାଚନର ୨୪୩ଟି ଆସନରେ ନିର୍ବାଚିତ ପ୍ରତିନିଧିଙ୍କ ତାଲିକା ରାଜ୍ଯପାଳଙ୍କୁ ପ୍ରଦାନ କରିଛନ୍ତି। ଆଜି ମୁଖ୍ଯମନ୍ତ୍ରୀ ନୀତିଶ କୁମାର ରାଜଭବନ ଯାଇ ରାଜ୍ଯପାଳଙ୍କୁ ବିଧିବଦ୍ଧ ଭାବେ ତାଙ୍କ ସରକାରଙ୍କ ଇସ୍ତଫା ପତ୍ର ପ୍ରଦାନ କରିବେ। ଏହାସହିତ ନୀତିଶ କୁମାରଙ୍କ ଅଧ୍ଯକ୍ଷତାରେ ଆଜି ବସିବ ବିଧାୟକ ଦଳ ବୈଠକ। ବିଧାୟକ ଦଳ ବୈଠକରେ ନୀତିଶଙ୍କୁ ପୁଣି ଥରେ ନେତା ଭାବେ ଘୋଷଣା କରାଯିବା ନେଇ ସୂଚନା ରହିଛି। ହେଲେ ସଂଖ୍ଯା ଗଣିତରେ ବିଜେପିର ଅଧିକ ବିଧାୟକ ଥିବାରୁ ଜେଡିୟୁ ମୁଖିଆ ନୀତିଶ କୁମାରଙ୍କୁ ମୁଖ୍ଯମନ୍ତ୍ରୀ କରିବାକୁ ନିଷ୍ପତ୍ତି ନେଉଛି ନା ଆଉ କାହାକୁ ସେ ନେଇ ଏବେ ବି ଚିତ୍ର ସ୍ପଷ୍ଟ ହୋଇନି।
