ସଂଚାର ବ୍ୟୁରୋ: ତିରୁପତି ମନ୍ଦିରକୁ ଆସୁଥିବା ଘିଅ ଗାଡିରେ ଜିପିଏସ ଲଗାଇଛନ୍ତି କର୍ଣ୍ଣାଟକ ମିଲ୍କ ଫେଡେରେସନ । ତିରୁପତି ମନ୍ଦିର ଲଡୁରେ ପଶୁ ଚର୍ବି ବ୍ୟବହାର ହେଉଥିବା ମାମଲା ସାମ୍ନାକୁ ଆସିବା ପରେ ଏଭଳି ଉପାୟ କରାଯାଇଛି । କେଏମଏଫର ପ୍ରବନ୍ଧକ ନିର୍ଦ୍ଦେଶକ ଏମ କେ ଜଗଦୀଶ କହିଛନ୍ତି, ଟିଟିଡିରେ ନନ୍ଦିନୀ ବ୍ରାଣ୍ଡ ଘିଅ ବ୍ୟବହାର କରିବା ପାଇଁ କକର୍ଣ୍ଣାଟକ ସରକାର ନିର୍ଦ୍ଦେଶ ଦେଇଛନ୍ତି । ନନ୍ଦିନୀ କର୍ଣ୍ଣାଟକ ମିଲ୍କ ଫେଡେରେସନର ଲୋକପ୍ରିୟ ବ୍ରାଣ୍ଡ ।
ତେବେ ଜିପିଏସ ଲାଗିବା ଦ୍ୱାରା ଘିଅ ଭର୍ତ୍ତି ଟ୍ରକ କେଉଁ କେଉଁ ସ୍ଥାନ ଦେଇ ଆସୁଛି, ରହୁଛି ତାହାର ଗତିବିଧିକୁ ଅନୁଧ୍ୟାନ କରାଯାଇପାରିବ । କେବେ ବି ଘିଅରେ କୌଣସି ଜିନିଷ ଯେଭଳି କିଛି ନ ମିଶେ ଏହାର ମୂଳ ଉଦେଶ୍ୟ । ଜିପିଏସର ବ୍ୟବହାର କୌଣସି ଗାଡିର ବାସ୍ତବିକ ଅବସ୍ଥିତିକୁ ଜାଣିବା ପାଇଁ କରାଯାଏ ।
କର୍ଣ୍ଣାଟକ ମିଲ୍କ ଫେଡେରେସନକୁ ୩୫୦ ଟନ ଘିଅର ଅଭାବକୁ ପୂରଣ କରିବା ପାଇଁ କଣ୍ଟ୍ରାକ୍ଟ କରାଯାଇଛି । ଯେତେବେଳେ ଘିଅର ଆବଶ୍ୟକତା ପଡିବ, ସେତେବେଳେ ଏହାକୁ ପୂରଣ କରାଯିବ ବୋଲି ଫେଡେରେସନ ପକ୍ଷରୁ କୁହାଯାଇଛି ।
ଗତକାଲି କର୍ଣ୍ଣାଟକ ସରକାର ଗାଇଡଲାଇନ ଜାରି କରି କହିଛନ୍ତି ଯେ, ରାଜ୍ୟର ମନ୍ଦିର ପରିଚାଳନା ସଂସ୍ଥା ଅଧୀନରେ ଥିବା ସମସ୍ତ ୩୪ ହଜାର ମନ୍ଦିରରେ କେବଳ ନନ୍ଦିନୀ ବ୍ରାଣ୍ଡର ଘିଅ ବ୍ୟବହାର କରାଯିବ । ରାଜ୍ୟ ଅଧୀନରେ ଥିବା ସମସ୍ତ ମନ୍ଦିରରେ କେବଳ କର୍ଣ୍ଣାଟକ ମିଲ୍କ ଫଡେରେସେନ୍ (KMF) ଦ୍ୱାରା ଉତ୍ପାଦିତ ନନ୍ଦିନୀ ଘିଅ ବ୍ୟବହାର କରାଯିବ । ଠାକୁରଙ୍କ ପାଖରେ ଲାଗିହେଉଥିବା ଭୋଗ ବା ପ୍ରସାଦ ସହ ଦୀପ ଜାଳିବା ପାଇଁ ମଧ୍ୟ ନନ୍ଦିନୀ ଘିଅ ବ୍ୟବହାର କରିବାକୁ ସରକାର ନିର୍ଦ୍ଦେଶ ଦେଇଛନ୍ତି ।
ସୂଚନାଯୋଗ୍ୟ, ଆନ୍ଧ୍ରପ୍ରଦେଶର ପ୍ରସିଦ୍ଧ ତିରୁପତି ତିରୁମାଳା ମନ୍ଦିରର ଲଡ଼ୁ ତିଆରି ପାଇଁ ପଶୁ ଚର୍ବି ବ୍ୟବହାର ହେଉଥିବା ନେଇ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଅଭିଯୋଗ ଆଣିଥିଲେ । ପୂର୍ବରୁ ୱାଇଏସଆର କଂଗ୍ରେସ ଜଗନ ସରକାର ଏଭଳି କରିଥିବା ଚନ୍ଦ୍ରବାବୁ ନାଇଡୁ ଅଭିଯୋଗ କରିଥିଲେ । ଏହାପରେ NDDB CALF ନାମକ ଘରୋଇ ଲ୍ୟାବରେ ଲଡ଼ୁର ମାନ ପରୀକ୍ଷଣ କରାଯାଇଥିଲା । ପରୀକ୍ଷଣ ପରେ ମୁଖ୍ୟମନ୍ତ୍ରୀଙ୍କ ଅଭିଯୋଗ ସତ ସାବ୍ୟସ୍ତ ହୋଇଛି । ଏହାପରେ କେନ୍ଦ୍ର ସରକାରଙ୍କ ପକ୍ଷରୁ ଆନ୍ଧ୍ରପ୍ରଦେଶ ସରକାରଙ୍କୁ ରିପୋର୍ଟ ମଗାଯାଇଛି ।
