ବାରବାଟୀ ଷ୍ଟାଡିୟମରେ ଆସନ୍ତା ୯ ତାରିଖରେ ଅନୁଷ୍ଠିତ ହେବ ଭାରତ- ଇଂଲଣ୍ଡ ଏକ ଦିବସୀୟ ମ୍ୟାଚ। ସେଥିପାଇଁ ଅନଲାଇନରେ ରବିବାର ଟିକେଟ ବିକ୍ରି ଆରମ୍ଭ ହୋଇଥିଲା। ତେବେ ଟିକେଟ ବିକ୍ରିର ଆରମ୍ଭ ହେବାର ମାତ୍ର ୩୫ ମିନିଟରେ ଦୁଇ ନମ୍ବର ଓ ଚାରି ନମ୍ବର ଗ୍ୟାଲେରୀ ଟିକେଟ ଶେଷ ହୋଇଯାଇଛି। ସେହିପରି ୭ ନଂ ଗ୍ୟାଲେରୀ ଟିକେଟ ଓ ସ୍ପେଶାଲ ଏନକ୍ଲୋଜର ଟିକେଟ ଶେଷ ହୋଇଯାଇଥିଲା। ଅନାଉ ଅନାଉ ଅନଲାଇନରେ ଟିକେଟ ଶେଷ ହୋଇଯିବାରୁ ବହୁ କ୍ରୀଡା ପ୍ରେମୀଙ୍କୁ ନିରାଶ ହେବାକୁ ପଡିଛି।
ରବିବାର ସମୟ ଅପରାହ୍ନ ଚାରିଟା।ବାରବାଟି ଦିନିକିଆ ମ୍ୟାଚ ପାଇଁ ଓସିଏ ପକ୍ଷରୁ ଦିଆଯାଇଥିବା ଟିକେଟ ବୁକିଂ ପାଇଁ ଅନଲାଇନ ସାଇଡ ଖୋଲିଥିଲା। ଅନଲାଇନରେ ମାତ୍ର ଚାରି ହଜାର ଟିକେଟ ବିକ୍ରି ପାଇଁ ଥିବା ବେଳେ ଅନାଉ ଅନାଉ ସରିଯାଇଥିଲା ।ବହୁ କ୍ରୀଡ଼ା ପ୍ରେମୀ ଅନଲାଇନ ରେ ଟିକେଟ କିଣିବା ପାଇଁ ଦିଆ ଯାଇଥିବା ସାଇଡ ଖୋଲିବାକୁ ଚେଷ୍ଟା କରିଥିଲେ । କିନ୍ତୁ ହଜାର ହଜାର କ୍ରିକେଟ ଫ୍ୟାନ ଏକାଥରେ ସାଇଡ ଖୋଲିଥିବାରୁ ସର୍ଭର୍ ଡାଉନ୍ ରହୁଥିବାରୁ ଟିକେଟ କିଣିବା ରୁ ବଞ୍ଚିତ ହୋଇଛନ୍ତି। ମାତ୍ର ଚାରି ହଜାର ଟିକେଟ ଥିବାରୁ ଖୁବ୍ ସ୍ୱଳ୍ପ ସମୟ ଭିତରେ ସବୁ ଟିକେଟ ଶେଷ ହୋଇଯାଇଥିଲା। କେବଳ ସେତିକି ନୁହେଁ ବାରବାଟି ଷ୍ଟାଡିୟମ୍ ରେ କମ ଟଙ୍କା ରେ ଚାହିଦା ଥିବା ଏକ ନମ୍ବର ତିନି ନମ୍ବର ଓ ପାଞ୍ଚ ନମ୍ବର ଗ୍ୟାଲେରୀର ଟିକେଟ ମିଳୁନଥିବାରୁ ଅସନ୍ତୋଷ ଜାହିର କରିଛନ୍ତି କ୍ରିକେଟ ପ୍ରେମୀ ମାନେ। ଅନ୍ୟପଟେ ଆସନ୍ତା ୫ ଓ ୬ ତାରିଖରେ ଅଫ ଲାଇନରେ ଟିକେଟ ବିକ୍ରି ହେବ।
