ସଂଚାର ବ୍ୟୁରୋ: ଅନ୍ଧାରରେ ଚାଲିଛି ମା‘ ତାରାତାରିଣୀଙ୍କ ପୂଜା । ମାଙ୍କ ପୀଠରେ ବଡ଼ ଅବ୍ୟବସ୍ଥାର ଚିତ୍ର ସାମ୍ନାକୁ ଆସିଛି । ଆଜି ମା‘ ତାରାତାରିଣୀଙ୍କ ପୀଠରେ ଷଷ୍ଠୀ ପୂଜା ଚାଲିଥିବା ବେଳେ, ଗର୍ଭଗୃହ ସମ୍ପୂର୍ଣ୍ଣ ରୂପେ ଅନ୍ଧାର ରହିଛି । ଯାହାଫଳରେ ଦୀପର ଆଲୁଅରେ ଚାଲିଛି ମା‘ଙ୍କ ପୂଜା । ଅନ୍ଧାର ଯୋଗୁ ମା‘ଙ୍କୁ ଦର୍ଶନ କରିନପାରି ଅସନ୍ତୋଷ ପ୍ରକାଶ କରିଛନ୍ତି ଭକ୍ତ। ମନ୍ଦିର ବାହାର ଆଲୋକିତ ହୋଇଥିବା ବେଳେ ଗର୍ଭଗୃହ କିଟି କିଟି ଅନ୍ଧାର ହୋଇ ରହିଛି । ଗର୍ଭଗୃହରେ ଲାଇଟର ବ୍ୟବସ୍ଥା ଥିବା ସତ୍ତ୍ବେ ମଧ୍ୟ ଏଭଳି କାହିଁକି ଅନ୍ଧାର ହେଲା ତାହା ଅସ୍ପଷ୍ଟ ରହିଛି । ମା‘ଙ୍କ ନବରାତ୍ର ପୂଜା ଚାଲିଥିବା ବେଳେ ଭକ୍ତଙ୍କ ଭିଡ଼ ଲାଗିଛି । କିନ୍ତୁ ପ୍ରଶାସନର ଅବହେଳା କାରଣରୁ ଏଭଳି ଅନ୍ଧକାର ସ୍ଥିତି ସୃଷ୍ଟି ହୋଇଥିବା ଅଭିଯୋଗ କରିଛନ୍ତି ଭକ୍ତ । ତୁରନ୍ତ ସମାଧାନର ପନ୍ଥା ବାହାର କରିବାକୁ ଦାବି କରିଛନ୍ତି ଭକ୍ତ।
