ଚଳିତବର୍ଷ ମହାକୁମ୍ଭରେ ଅନେକ ସେଲିବ୍ରିଟି ସଙ୍ଗମ ସ୍ଥଳରେ ବୁଡ଼ ପକାଇସାରିଲେଣି । ଏବେ ଏହି ତାଲିକାରେ ସାମିଲ ହୋଇଛନ୍ତି ଅଭିନେତା ତଥା କମେଡିଆନ୍ ସୁନିଲ ଗ୍ରୋଭର । ସୁନିଲ ଇନଷ୍ଟାରେ ଭିଡିଓ ସେୟାର କରି ମହାକୁମ୍ଭ ଯାଇଥିବା କଥା ଫ୍ୟାନମାନଙ୍କୁ ଜଣାଇଛନ୍ତି । ସେ ଗଙ୍ଗାରେ ବୁଡ଼ ପକାଇଛନ୍ତି ।
ମହାକୁମ୍ଭରେ ସାମିଲ ହୋଇଥିବାରୁ ସୁନିଲଙ୍କ ଖୁସିର ଠିକଣା ନାହିଁ । ସେ ପୋଷ୍ଟରେ ନିଜର ଭାବନାକୁ ବଖାଣିଛନ୍ତି । ସୁନିଲ ଲେଖିଛନ୍ତି, ‘ଦିବ୍ୟ, ଦୈବୀ, ଈଶ୍ୱରୀୟ… ମହାକୁମ୍ଭ ୨୦୨୫ରେ ସାମିଲ ହୋଇ ବହୁତ ଖୁସି ଅନୁଭବ କରୁଛି । ସଙ୍ଗମରେ ବୁଡ଼ ପକାଇ ଧନ୍ୟ ହୋଇଗଲି’ ।
ସେ ଆହୁରି ମଧ୍ୟ ଲେଖିଛନ୍ତି, ‘ଏଠାକୁ ଆସି ମୋତେ ସମ୍ପୂର୍ଣ୍ଣ ଅନୁଭବ ହେଉଛି । ଏଠାକୁ ଆସିବା ପାଇଁ ମୋତେ ସାହାଯ୍ୟ କରିଥିବା ଲୋକଙ୍କୁ ଧନ୍ୟବାଦ, ଜୟ ହୋ’ ।
ସୁନିଲ ଗ୍ରୋଭରଙ୍କ ପୂର୍ବରୁ ରେମୋ ଡି’ସୁଜା, ସପନା ଚୌଧୁରୀ, ଅଦା ଶର୍ମା, ଗୁରୁ ରନ୍ଧାୱାଙ୍କ ଭଳି କଳାକାର ମଧ୍ୟ ମହାକୁମ୍ଭ ଯାଇ ବୁଡ଼ ପକାଇଥିଲେ ।
ବଲିଉଡ୍ କୋରିଓଗ୍ରାଫର ରେମୋ ଡି’ସୁଜା ନିଜ ବେଶ ବଦଳାଇ ମହାକୁମ୍ଭରେ ପହଞ୍ଚିଥିଲେ । ସେ କଳା କପଡ଼ାରେ ମୁହଁକୁ ଢାଙ୍କି ରଖିଥିଲେ । ପ୍ରଥମ ନଜରରେ ତାଙ୍କୁ ଚିହ୍ନବା କଷ୍ଟକର ଥିଲେ ବି ଜଣେ ମହିଳା କିନ୍ତୁ ଚିହ୍ନି ନେଇଥିଲେ । ସେ ସଙ୍ଗମ ପାର୍ଶ୍ଵ ସିଡି ଦେଇ ଯିବାବେଳେ ମହିଳା ଜଣକ ତାଙ୍କୁ ଚିହ୍ନିଥିଲେ । ସେ ରେମୋଙ୍କୁ ଅଟକାଇବାକୁ ଚେଷ୍ଟା କରିଥିଲେ ମଧ୍ୟ ରେମୋ ଅଟକି ନ ଥିଲେ ।
କୋରିଓଗ୍ରାଫର ନିଜର ଫଟୋ ଓ ଭିଡିଓ ଇନଷ୍ଟାଗ୍ରାମରେ ସେୟାର କରିଥିଲେ । ଏଥିରେ ସେ କଳା ପୋଷାକ ପିନ୍ଧି ହାତରେ ବ୍ୟାଗ୍ ଧରି ଚାଲୁଥିବାର ଦେଖାଯାଇଥିଲା । ସାଥୀରେ ଥିଲେ ପତ୍ନୀ ଲିଜେଲ । ରେମୋ ସିଙ୍ଗମରେ ବୁଡ଼ ପକାଇବା ସହ ଧ୍ୟାନରେ ଲୀନ ହୋଇଥିଲେ । ସେ ଡଙ୍ଗାରେ ବସି ବୁଲିଥିଲେ । ପକ୍ଷୀମାନଙ୍କୁ ଦାନା ଖୁଆଇଥିଲେ । ପତ୍ନୀଙ୍କ ସହ ମହାକୁମ୍ଭରେ ପହଞ୍ଚିଥିବା ରେମୋ ସ୍ୱାମୀ କୈଳାଶାନନ୍ଦ ଗିରି ମହାରାଜଙ୍କ ପ୍ରବଚନ ଶୁଣି ଆଶୀର୍ବାଦ ନେଇଥିଲେ ।
