ସୁନ୍ଦରଗଡ଼ ଜିଲ୍ଲା ଦର୍ଲିପାଲି ଏନଟିପିସି ପାୱାର ପ୍ଲାଣ୍ଟକୁ ବନ୍ଦ କରିଦେଲେ ଗ୍ରାମବାସୀ । ଫ୍ଲାଏ ଆସ ଏବଂ ପାୱାର ପ୍ଲାଣ୍ଟକୁ ବନ୍ଦ କରି ବରୋବୋଗା ଓ ଆଲୁପଡ଼ା ଗ୍ରାମବାସୀଙ୍କ ଆନ୍ଦୋଳନ । ଆନ୍ଦୋଳନରେ ବିଧାୟକ ଯୋଗେଶ କୁମାର ସିଂ ଏବଂ ସମାଜସେବୀ ଡକ୍ଟର ହିମାଂଶୁ ଷଡ଼ଙ୍ଗୀ ସାମିଲ ହୋଇଛନ୍ତି । ଦର୍ଲିପାଲି ଏନଟିପିସି ପାୱାର ପ୍ଲାଣ୍ଟର ବର୍ଜ୍ୟ ପାଉଁଶ ପୋଖରୀ ବା ଫ୍ଲାଏ ଆସ ପଣ୍ଡ ଯୋଗୁଁ ସମସ୍ୟା ଭୋଗୁଛନ୍ତି ସ୍ଥାନୀୟ ଲୋକେ । ଅନ୍ୟତ୍ର ଥଇଥାନ ପାଇଁ ପ୍ରଶାସନ ନଶୁଣିବାରୁ ବାଧ୍ୟ ହୋଇ ଆଜି ଆନ୍ଦୋଳନକୁ ଓହ୍ଲାଇଛନ୍ତି ପ୍ରଭାବିତ ଗ୍ରାମବାସୀ । ବରୋବୋଗା ଏବଂ ଆଲୁପଡ଼ା ଗ୍ରାମବାସୀ ଆଜି ସକାଳରୁ ଫ୍ଲାଏ ଆସ୍ ଏବଂ ପାୱାର ପ୍ଲାଣ୍ଟକୁ ବନ୍ଦ କରିଦେଇଛନ୍ତି । ପାଉଁଶ ପୋଖରୀ ମଧ୍ୟରେ ଥିବା ଗାଁକୁ ଅନ୍ୟତ୍ର ଥଇଥାନ ଓ କ୍ଷତିପୂରଣ ପ୍ରଦାନ ପାଇଁ ୨୦୧୩ ମସିହାରୁ ଦାବି କରିଆସୁଛନ୍ତି । ବାରମ୍ବାର ଜିଲ୍ଲା ପ୍ରଶାସନ ନିକଟରେ ଦାବି ଓ ଧାରଣାରେ ବସି ଆସୁଥିଲେ ମଧ୍ୟ ସମାଧାନ ହୋଇପାରିନାହିଁ । ବାଧ୍ୟ ହୋଇ ଆନ୍ଦୋଳନକୁ ଓହ୍ଲାଇଛନ୍ତି ପ୍ରଭାବିତ ଲୋକମାନେ । ଯେପର୍ଯ୍ୟନ୍ତ ତାଙ୍କୁ ବିସ୍ଥାପିତ ଓ ଥଇଥାନ କରାଯିବା ନେଇ କମ୍ପାନୀ ପ୍ରତିଶ୍ରୁତି ନ ଦେଇଛି ସେ ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଚେତାବନୀ ଦେଇଛନ୍ତି । ଘଟଣାସ୍ଥଳରେ ଉପଜିଲ୍ଲାପାଳ ଲୋକଙ୍କୁ ବୁଝାସୁଝା କରିଛନ୍ତି ।
