କୋଟିଆ ପାଇଁ ତିଆରି ହେବ ସ୍ୱତନ୍ତ୍ର ରୋଡ଼ ମ୍ୟାପ । ବିକଶିତ କୋଟିଆ ପାଇଁ ମାଷ୍ଟର ପ୍ଲାନ ପ୍ରସ୍ତୁତ କରିବାକୁ ବୈଠକ । କୋଟିଆ ପାଇଁ ଗଠନ ହୋଇଥିବା ୧୬ ଜଣିଆ କମିଟିର ପ୍ରଥମ ବୈଠକ ଆଜି ରାଜସ୍ବ ମନ୍ତ୍ରୀ ସୁରେଶ ପୂଜାରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି । କୋଟିଆବାସୀଙ୍କ ନିକଟରେ ସବୁ ସୁବିଧା କେମିତି ପହଞ୍ଚିବ, ତା ଉପରେ ଗୁରୁତ୍ୱ ଦିଆଯିବ । ଆର୍ଥିକ, ସାମାଜିକ ଓ ସାଂସ୍କୃତିକ ବିକାଶ ପାଇଁ ଯୋଜନା ହାତକୁ ନିଆଯିବ । ଏପରିକି ସୁପ୍ରିମକୋର୍ଟରେ ହାରିଥିବା ମାମଲାକୁ ପୁଣି ବିଚାରକୁ ନିଆଯିବ ।
ଆଜିର ପ୍ରଥମ କୋଟିଆ ବୈଠକରେ ସମସ୍ତ ବିଭାଗକୁ ରାଜସ୍ବ ମନ୍ତ୍ରୀ ଏଭଳି ନିର୍ଦ୍ଦେଶ ଦେଇଛନ୍ତି । ୧ ମାସ ମଧ୍ୟରେ ନିଜ ନିଜ ବିଭାଗର ରୋଡ଼ ମ୍ୟାପ ଦେବାକୁ ନିର୍ଦ୍ଦେଶ ଦିଆଯାଇଛି । ଜିଲ୍ଲାପାଳଙ୍କ ସହ ଆଲୋଚନା କରି ନିଜ ନିଜ ବିଭାଗର ଯୋଜନା ଏବଂ ରୋଡ଼ମ୍ୟାପ ଦେବାକୁ ସବୁ ବିଭାଗ ସଚିବ ମାନଙ୍କୁ ନିର୍ଦ୍ଦେଶ ଦିଆଯାଇଛି । ରାଜସ୍ବ ମନ୍ତ୍ରୀ କହିଛନ୍ତି, କୋଟିଆ ଓଡ଼ିଶାର ଅବିଚ୍ଛେଦ୍ୟ ଅଙ୍ଗ, ଏହାକୁ ନେଇ ସାଲିସ ହେବ ନାହିଁ । ଆଜିର କୋଟିଆ ବୈଠକରେ କମିଟିର ସଦସ୍ୟ ଥିବା ଏକାଧିକ ବିଭାଗର ସଚିବ , କୋରାପୁଟ ଜିଲ୍ଲାପାଳ, ଏସପି ଏବଂ ପୂର୍ବତନ ଜିଲ୍ଲାପାଳ ମଧ୍ୟ ଉପସ୍ଥିତ ଥିଲେ ।
