ସଂଚାର ବ୍ୟୁରୋ: ଚଳଚଞ୍ଚଳ ରଥ ଖଳା । ଆଜିଠୁ ଆରମ୍ଭ ତୃତୀୟ ପର୍ଯ୍ୟାୟ ରଥ ର୍ନିମାଣ କାର୍ଯ୍ୟ । ଶୀତଳଷଷ୍ଠୀ ପର୍ଯ୍ୟନ୍ତ ଚାଲିବ ରଥ ଚକ କାର୍ଯ୍ୟ । ସ୍ନାନପୂର୍ଣ୍ଣିମାରେ ଚାରି ନାହାକା ଉଠିବାର ବିଧି ରହିଛି । ଗତକାଲି ଭଉଁରୀରେ ରଥଖଳାରେ ଡେରା ହୋଇଥିଲା ଚକ-ଅଖ । ଚକଅଖ ଡେରିଥିଲେ ଭୋଇ ସେବାୟତ । ପବିତ୍ର ଅକ୍ଷୟ ତୃତୀୟାରେ ରଥ ନିର୍ମାଣର ଶୁଭାରମ୍ଭ ହୋଇଥିବାବେଳେ ଭଉଁରୀରେ ସମ୍ପନ୍ନ ହୋଇଛି ଚକ-ଅଖ ଡେରା ନୀତି । ଶ୍ରୀମନ୍ଦିରରେ ସକାଳ ଧୂପ ନୀତି ପରେ ପୂଜାପଣ୍ଡା ସେବକଙ୍କ ଦ୍ୱାରା ପଟୁଆରରେ ରଥଖଳାକୁ ବିଜେ କରିଥିଲା ଆଜ୍ଞାମାଳ । ଭୋଇ ସେବକମାନେ ୩ ରଥର ଦୁଇ ଦୁଇଟି ନାହାକା ଚକରେ ଅଖ ସଂଯୋଗ କରିଥିଲେ । ନିର୍ଦ୍ଧାରିତ ସମୟରେ କାମ ସରିଥିବାରୁ ରଥ ନିର୍ମାଣ କାମ ସଠିକ ସମୟରେ ସରିବା ନେଇ ଆଶା ରଖିଛନ୍ତି କାରିଗର । ସେପଟେ ରଥଯାତ୍ରାରେ ଯେଭଳି କୌଣସି ବିଶୃଙ୍ଖଳା ନ ହୁଏ, ସେନେଇ ମହାପ୍ରଭୁଙ୍କ ନିକଟରେ ପ୍ରାର୍ଥନା କରିଛି ଶ୍ରୀମନ୍ଦିର ପ୍ରଶାସନ । ପ୍ରବଳ ଗ୍ରୀଷ୍ମ ପ୍ରବାହ ସତ୍ତ୍ବେ ରଥକାମରେ ଲାଗି ପଡ଼ିଛନ୍ତି ମହାରଣା, ଭୋଇ, ରୂପକାର ଓ କମାର । ଏଥିପାଇଁ ଶ୍ରୀନଅର ଆଗରେ ଥିବା ଚାଳିଆରେ ପ୍ରଶାସନ ପକ୍ଷରୁ ସମସ୍ତ ଆନୁସଂଗୀକ ବ୍ୟବସ୍ଥା କରାଯାଇଛି ।
