ମେଟ୍ରୋ ନେଇ ନଗର ଉନ୍ନୟନ ମନ୍ତ୍ରୀଙ୍କ ବଡ ସୂଚନା । ଶ୍ରୀକ୍ଷେତ୍ରକୁ ଗଡିବ ମେଟ୍ରୋ ! ପୁରୀ ପର୍ଯ୍ୟନ୍ତ ମେଟ୍ରୋ ଗଡିବା ନେଇ ଅନୁଧ୍ୟାନ ଚାଲିଛି କହିଲେ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର । ଏହାକୁ ନେଇ ଉଚ୍ଚ ସ୍ତରୀୟ କମିଟି ଗଠନ କରାଯାଇଛି । ଏଥିପାଇଁ ମେଟ୍ରୋର DPRରେ ପରିବର୍ତ୍ତନ ହୋଇପାରେ । କମିଟି ସବୁ ଦିଗକୁ ଅନୁଧ୍ୟାନ କରି ନିଷ୍ପତ୍ତି ନେବ । ରାଜ୍ୟ ସରକାରଙ୍କୁ ସବିଶେଷ ରିପୋର୍ଟ ଦେବା ପରେ ଆଗକୁ ଏହାକୁ ନେଇ ବଡ ନିଷ୍ପତ୍ତି ନିଆଯିବ ।
ସେପଟେ ମେଟ୍ରୋ କାମ ଯେମିତି ଚାଲିବା କଥା ଚାଲିଛି । ତେବେ ଏହା କିଭଳି ଆର୍ଥିକ ଦୃଷ୍ଟିରୁ ସମ୍ଭବ ହୋଇପାରିବ ତାହାର ସମୀକ୍ଷା କରିବାକୁ ଏକ କମିଟି ଗଠନ କରାଯାଇଛି । ଏହି କମିଟି ଦେଶରେ ମେଟ୍ରୋ ଚଳାଚଳ କରୁଥିବା ବିଭିନ୍ନ ସ୍ଥାନକୁ ଯାଇ ସମୀକ୍ଷା କରୁଛି । ରୁଟ୍ କିଭଳି ରହିବ, କଣ ପରିବର୍ତ୍ତନ ଦରକାର, ତାହା ଉପରେ ମଧ୍ୟ ଆଲୋଚନା ଚାଲିଛି ।
ଅନ୍ୟପଟେ ରାଜ୍ୟରେ ମୋ ବସ୍ ଦୁର୍ଘଟଣା ରୋକିବାକୁ ଅନୁଧ୍ୟାନ ଚାଲିଥିବା ନେଇ ମଧ୍ୟ କହିଛନ୍ତି ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର । ବସ ଆଗରେ ଓ ପଛରେ ସିସିଟିଭି କ୍ୟାମେରା ଲଗାଯିବ । କାହା ଦୋଷ ରହୁଛି ତାହା ଜଣାପଡ଼ିବ । ଡ୍ରାଇଭରଙ୍କୁ ତାଗିଦ ବି କରାଯାଉଛି । ଡ୍ରାଇଭର ମଦ ପିଇଛନ୍ତି ନା ନାହିଁ, ତାକୁ ଦିନକୁ ତିନି ଥର ପରୀକ୍ଷା କରାଯାଉଛି । ଏପରି ୭ଟି ମାମଲାରେ ଡ୍ରାଇଭରଙ୍କୁ ବରଖାସ୍ତ କରାଯାଇଛି । ସେମାନଙ୍କ ଲାଇସେନ୍ସ ବାତିଲ କରିବାକୁ RTOଙ୍କୁ ଚିଠି ଲେଖାଯାଇଛି । ଲୋକଙ୍କ ଜୀବନ ସହ ଖେଳିବାର ସେମାନଙ୍କ ଅଧିକାର ନାହିଁ । ଡ୍ରାଇଭରମାନଙ୍କୁ ଟ୍ରେନିଂ ଦେଇ ଦକ୍ଷ କରାଯିବ ।
