ସଂଚାର ବ୍ୟୁରୋ: ଧର୍ମଶାଳା ବିଧାୟକ ହିମାଂଶୁ ସାହୁଙ୍କ ଉପରେ ଯାଜପୁର ବରୁଆଁ ନିକଟରେ ଆକ୍ରମଣ ଅଭିଯୋଗ। କିଛି ଦୁର୍ବୃତ୍ତ ବିଧାୟକଙ୍କ ଉପରେ ଆକ୍ରମଣ କରିଥିବା ସେ କହିଛନ୍ତି। ଏନେଇ ପ୍ରତିକ୍ରିୟା ରଖିଛନ୍ତି ଯାଜପୁରର ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସ । ସେ କହିଛନ୍ତି ଯେ, ବିରଜା ପ୍ରକଳ୍ପକୁ ନେଇ କିଛି ଲୋକ ରାସ୍ତାରୋକ କରିଥିଲେ । ବିଧାୟକ ସେହି ରାସ୍ତା ଦେଇ ଯାଉଥିବା ବେଳେ ତାଙ୍କ ଉପରେ ଆକ୍ରମଣ ହୋଇଥିବା ମୁଁ ଶୁଣିଛି। ବିଜେଡି କେବେ ହିଂସାରେ ବିଶ୍ବାସ କରେନି । ଆନ୍ଦୋଳନ ସମୟରେ କଣ ଘଟିଛି ତାହା ମୁଁ ଜାଣିନି । କିନ୍ତୁ କୌଣସି ଭାବେ ହିଂସାକୁ ପ୍ରଶ୍ରୟ ଦିଆଯିବନି । ଏଭଳି ଖବର ଶୁଣି ମୁଁ ମୋ ଭାଇକୁ ପୋଲିସକୁ ସହଯୋଗ କରିବାକୁ କହିଛି। ପ୍ରଶାସନକୁ ସବୁ ପ୍ରକାର ସହଯୋଗ କରାଯିବ ବୋଲି କହିଛନ୍ତି ପ୍ରଣବ ପ୍ରକାଶ । ବିଧାୟକ ଓ ଆନ୍ଦୋଳକାରୀଙ୍କ ଭିତରେ ଉତ୍ତେଜନା ପରେ ବିଧାୟକଙ୍କ ସମର୍ଥକମାନେ ମଧ୍ୟ କିଛି ଭଙ୍ଗାରୁଜା କରିଥିବା ଶୁଣିବାକୁ ମିଳୁଛି । ତେଣୁ ଉଭୟ ପକ୍ଷରୁ କୌଣସି ପ୍ରକାର ହିଂସା ହେବା ଉଚିତ ନୁହେଁ। ବିଜେଡି ସବୁବେଳେ ଆଇନ ଶୃଙ୍ଖଳାକୁ ସମ୍ମାନ ଦେଇ ଆସୁଛି ବୋଲି କହିଛନ୍ତି ପ୍ରଣବ ପ୍ରକାଶ ଦାସ । ତେବେ ବବିଙ୍କ ପ୍ରତିକ୍ରିୟା ପରେ କୁହାଯାଉଛି କି, ସେ କେବଳ ସଫେଇ ଦେଉଛନ୍ତି । ସବୁ ଘଟଣାରେ ରହି ଏବେ ଖସି ଯିବାକୁ ଏଭଳି ସଫେଇ ଦେଉଛନ୍ତି ।
ଅନ୍ୟପଟେ ହିମାଂଶୁ ସିଧାସଳଖ କହିଥିଲେ କି, ବବି ଦାସଙ୍କ ସମର୍ଥକମାନେ ହିଁ ମୋତେ ଆକ୍ରମଣ କରିଛନ୍ତି । ସେମାନେ ବାରମ୍ବାର ଗୋଟିଏ କଥା କହୁଥିଲେ କି, ଭାଇ କହିଛି, ଏଇଟାକୁ ଜୀବନରୁ ମାରିଦେବା । ଯେଉଁ କାରଣରୁ ସେମାନେ ମୋ ଉପରେ ଆକ୍ରମଣ କରିଥିଲେ । ଗାଡ଼ିର କାଚ ଭାଙ୍ଗିବା ସହ ବେକ ଚିକିବାକୁ ଉଦ୍ୟମ କରିଥିଲେ । ସ୍ଥାନୀୟ ଲୋକେ ଆସିବାରୁ ସେମାନେ ଛାଡ଼ି ପଳାଇଲେ ।
