ସଂଚାର ବ୍ୟୁରୋ: ଭିଜିଲାନ୍ସ ଜାଲରେ ମହିଳା ପୋଲିସ ଅଧିକାରୀ । ଘରୋଇ ମାମଲାର ସମାଧାନ ପାଇଁ ଟଙ୍କା ନେଉଥିବା ବେଳେ ଧରିଲା ଭିଜିଲାନ୍ସ । ବ୍ରହ୍ମପୁର ମହିଳା ଥାନାର ଏଏସଆଇ ବବିତା ସୁନାକୁ ୧୦ ହଜାର ଟଙ୍କା ଲାଞ୍ଚ ନେଉଥିବା ବେଳେ କାବୁ କରିଛି ଭିଜିଲାନ୍ସ । କେ. ନୂଆଗାଁ ଥାନା ଅନ୍ତର୍ଗତ ବଳିୟାରସିଂହପଲ୍ଲୀର ଏକ ଘରୋଇ କହଳକୁ କେନ୍ଦ୍ରକରି ଥାନାରେ ହୋଇଥିଲା ମାମଲା । ପ୍ରମୋଦ କୁମାର ନାୟକ ପତ୍ନୀ ପ୍ରମୋଦ ଓ ତାଙ୍କ ମାଙ୍କ ନାମରେ ମହିଳା ଥାନାରେ ଘରୋଇ କଳିକୁ ନେଇ ଏକ ମାମଲା ଦେଇଥିଲେ । ସମ୍ପୃକ୍ତ ମାମଲାକୁ ରଫାଦଫା କରିବା ପାଇଁ ମହିଳା ଥାନାର ଏଏସଆଇ ବବିତା ସୁନା ପ୍ରମୋଦକୁ ୧୦ ହଜାର ଟଙ୍କା ଲାଞ୍ଚ ମାଗିଥିଲେ । ପ୍ରମୋଦ ବ୍ରହ୍ମପୁର ଭିଜିଲାନ୍ସ କାର୍ଯ୍ୟାଳୟରେ ଅଭିଯୋଗ କରିଥିଲେ । ଅଭିଯୋଗ ମୁତାବକ ଆଜି ପ୍ରମୋଦ ଟଙ୍କା ଦେଉଥିବା ବେଳେ ବବିତାଙ୍କୁ କାବୁ କରିଛି ପୋଲିସ । ଲାଞ୍ଚ ଅର୍ଥ ୧୦ ହଜାର ଟଙ୍କା ଭିଜିଲାନ୍ସର ଅଧିକାରୀ ଜବତ କରିଛନ୍ତି । ଏହାପରେ ଭିଜିଲାନ୍ସ ପକ୍ଷରୁ ବବିତାଙ୍କ କାର୍ଯ୍ୟାଳୟ ଓ ସରକାରୀ କ୍ବାର୍ଟର୍ସରେ ମଧ୍ୟ ଚଢ଼ାଉ ଜାରି ରହିଛି । ବବିତା ସୁନା ୨୦୧୬ରୁ ଏଏସଆଇ ଭାବେ ପଦୋନ୍ନତି ପାଇଥିବା ବେଳେ ଗତ ଦୁଇବର୍ଷ ହେଲା ସେ ମହିଳା ଥାନାରେ କାର୍ଯ୍ୟରତ ଅଛନ୍ତି ।
