ଚତୁର୍ଥୀ ଦିନ ଘରୁ ପଳାଇଗଲା ସ୍ତ୍ରୀ । ଶିଶୁପାଳ ହେଲା ଦ୍ବିତୀୟ ସ୍ବାମୀ । ଏଭଳି ଏକ ରୋଚକ ଘଟଣା ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲ୍ଲା ଡେରାବିଶ ଥାନା ଅଢ଼ଙ୍ଗା ମଲ୍ଲିକେଶ୍ବରପୁର ଗାଁରେ । ୪ ଦିନ ତଳେ ବିଜୟ ଶଙ୍କର ଦାସ ଲକ୍ଷ୍ମୀପ୍ରିୟା ସାହୁଙ୍କୁ ବିବାହ କରିଥିଲେ । ଏହାଥିଲା ଲକ୍ଷ୍ମୀପ୍ରିୟାଙ୍କର ଦ୍ବିତୀୟ ବିବାହ । କାରଣ ପୂର୍ବରୁ ଲକ୍ଷ୍ମୀପ୍ରିୟା ସାଲେପୁର ନାନ୍ଦୋଳ ଅଞ୍ଚଳର ଲକ୍ଷ୍ମୀଧର ସାହୁଙ୍କୁ ପ୍ରଥମ ବିବାହ କରିଥିଲେ । ସମ୍ପର୍କରେ ତିକ୍ତତା ଆସିବାରୁ ଉଭୟ ଅଲଗା ରହୁଥିଲେ । ଉଭୟଙ୍କ ମଧ୍ଯରେ ଛାଡପତ୍ର ହୋଇଯାଇଥିବା ନେଇ ଝିଅଘର ଲୋକ କହିବା ସହ ବିଜୟଙ୍କ ସାଥିରେ ଦ୍ବିତୀୟ ବିବାହ ଠିକ କରିଥିଲେ । ପରେ ଉଭୟଙ୍କର ବିବାହ ହୋଇଥିଲା । ହେଲେ ଚତୁର୍ଥୀ ଦିନ ହିଁ ଲକ୍ଷ୍ମୀପ୍ରିୟା ନିଜ ପ୍ରଥମ ସ୍ବାମୀ ସହ ଫେରାର ହୋଇଯାଇଛନ୍ତି । ଘରେ ସମସ୍ତେ ଥିବାବେଳେ ହଠାତ ଦୌଡ଼ିଯାଇ ଜଣେ ଯୁବକଙ୍କ ସହ ବାଇକରେ ପଳାଇଯାଇଥିଲେ ଲକ୍ଷ୍ମୀପ୍ରିୟା । ସେ ତାଙ୍କ ଲକ୍ଷ୍ମୀଧରଙ୍କ ସହ ଫେରାର ହୋଇଯାଇଥିବା ସୂଚନା ମିଳିଛି । ତେବେ ଯିବା ସମୟରେ ବିଜୟଙ୍କ ଘରୁ ଟଙ୍କା ଓ ସୁନା ଅଳଙ୍କାର ନେଇଯାଇଥିବା ଅଭିଯୋଗ ହୋଇଛି । ଏନେଇ ଥାନାରେ ଅଭିଯୋଗ ପରେ ପୋଲିସ ଉଭୟ ପକ୍ଷଙ୍କୁ ଡାକି ବୁଝାସୁଝା କରିଛି ।
