ଡେରା ସଚ୍ଚା ମୁଖ୍ୟ ରାମ ରହିମଙ୍କୁ ପୁଣିଥରେ ପାରୋଲ ମିଳିଛି । ଦୁଷ୍କର୍ମ ଅଭିଯୋଗରେ ଦୋଷୀ ସାବ୍ୟସ୍ତ ହୋଇ ଜେଲ୍ ଦଣ୍ଡାଦେଶ ଭୋଗୁଥିବା ରାମ ରହିମଙ୍କୁ ୩୦ ଦିନର ପାରୋଲ୍ ମିଳିଛି । ଆତ୍ମଘୋଷିତ ବାବା ରାମ ରହିମ ଆଜି ସକାଳ ପ୍ରାୟ ୫.୨୬ରେ ଜେଲ୍ରୁ ମୁକ୍ତ ହୋଇଛନ୍ତି ।
ଗୁରମିତ୍ ରାମ ରହିମ ଏଥର ହରିଆଣାର ସିର୍ସାରେ ଥିବା ଡେରା ଆଶ୍ରମରେ ରହିବେ । ରିପୋର୍ଟ ଅନୁଯାୟୀ, ୨୦୧୭ ମସିହା ପରଠାରୁ ଏହାକୁ ମିଶାଇ ରାମ୍ ରହିମ ୧୨ ଥର ଜେଲ୍ରୁ ବାହାରି ସାରିଲେଣି ।
ରାମ ରହିମଙ୍କୁ ଅକ୍ଟୋବର ୨୦୨୪ରେ ପାରୋଲ ମିଳିଥିଲା । ସେତେବେଳେ ମଧ୍ୟ ତାଙ୍କୁ ୨୦ ଦିନର ପାରୋଲ ମିଳିଥିଲା । ଏହି ସମୟରେ ନିର୍ବାଚନ ସମ୍ବନ୍ଧୀୟ ପ୍ରଚାରରେ ଭାଗ ନେବାକୁ ରୋକ୍ ଲଗାଯାଇଥିଲା । ପାରୋଲ ସର୍ତ୍ତ ଅନୁଯାୟୀ, ରାମ ରହିମଙ୍କୁ କୌଣସି ନିର୍ବାଚନ ପ୍ରଚାରରେ ଭାଗ ନ ନେବାକୁ କୁହାଯାଇଥିଲା ।
ଚଳିତବର୍ଷ ଜାନୁଆରୀ ୧୯ରେ ରାମ ରହିମ ଜେଲରୁ ବାହାରିଥିଲେ । ସେତେବେଳେ ଶିରୋମଣି ଗୁରୁଦ୍ୱାରା ପ୍ରବନ୍ଧକ କମିଟି ପଞ୍ଜାବ ଏବଂ ହରିୟାଣା ହାଇକୋର୍ଟରେ ଯାଚିକା ଦାଖଲକୁ ରାମ ରହିମଙ୍କ ପାରୋଲକୁ ବିରୋଧ କରିଥିଲେ ।
ସୂଚନାଯୋଗ୍ୟ, ଡେରା ସଚ୍ଚା ସୌଦା ମୁଖ୍ୟ ଗୁରମିତ୍ ରାମ ରହିମ ସିଂହଙ୍କୁ ୨୦୧୭ ମସିହାରେ ତାଙ୍କର ଦୁଇ ଶିଷ୍ୟାଙ୍କୁ ଦୁଷ୍କର୍ମ କରିଥିବା ମାମଲାରେ ଦଣ୍ଡ ଦିଆଯାଇଥିଲା । ସେ ୨୦ ବର୍ଷର ଜେଲ ଦଣ୍ଡ ଭୋଗୁଛନ୍ତି ଏବଂ ହରିଆଣାର ରୋହତକ ଜିଲ୍ଲାର ସୁନାରିଆ ଜେଲରେ ବନ୍ଦୀ ରହିଛନ୍ତି । ୨୦୧୯ ମସିହାରେ, ଡେରା ମୁଖ୍ୟ ଏବଂ ଅନ୍ୟ ତିନି ଜଣଙ୍କୁ ୧୬ ବର୍ଷ ତଳେ ଜଣେ ସାମ୍ବାଦିକଙ୍କ ହତ୍ୟା କରିଥିବା ମାମଲାରେ ଦୋଷୀ ସାବ୍ୟସ୍ତ କରାଯାଇଥିଲା ।
୨୦୨୨ ରେ ମଧ୍ୟ ଡେରା ମୁଖ୍ୟଙ୍କୁ ନିଜର ଅସୁସ୍ଥ ମା’ଙ୍କୁ ଦେଖା କରିବାକୁ ସକାଳରୁ ସନ୍ଧ୍ୟା ପର୍ଯ୍ୟନ୍ତ ଜରୁରୀକାଳୀନ ପାରୋଲ ଦିଆଯାଇଥିଲା । ସେ ସ୍ୱାସ୍ଥ୍ୟଗତ କାରଣ ଦର୍ଶାଇ ଅନେକ ଥର ଜେଲରୁ ବାହାରକୁ ଆସିଥିଲେ ।
