ସଂଚାର ବ୍ୟୁରୋ: ପୁଣି ଥରେ ଲକ୍ଷେ ଟଙ୍କା ପାର୍ କଲା ସୁନା ଦର । ଆଜି ୨୪ କ୍ୟାରେଟ ସୁନା ୧୦ ଗ୍ରାମ ପିଛା ଭୁବନେଶ୍ବର ବଜାରରେ ରହିଛି ୧ ଲକ୍ଷ ୫୦୦ ଟଙ୍କା । ୨୨ କ୍ୟାରେଟ୍ ୧୦ ଗ୍ରାମ ପିଛା ହୋଇଛି ୯୧ ହଜାର ୩୦୦ ଟଙ୍କା । ଅନ୍ତରାଷ୍ଟ୍ରୀୟ ବଜାରରେ ସୁନା ୩ ହଜାର ୪୨୩ ଡଲାରରେ କାରବାର ହୋଇଛି । କିଛି ଦିନ ଧରି ସୁନା ଦର ୧ ଲକ୍ଷ ଟଙ୍କାରୁ କମ ଥିଲା । ଗତକାଲି ୨୪ କ୍ୟାରେଟ୍ ସୁନା ୯୯ ହଜାର ୮୦୦ ଟଙ୍କା ଥିବାବେଳେ ୨୨ କ୍ୟାରେଟ୍ ସୁନା ୧୦ ଗ୍ରାମ ପିଛା ଥିଲା ୯୦ ହଜାର ୮୦୦ ଟଙ୍କା । ଏବେ ଦର ପୁଣି ଥରେ ଉପରମୁହାଁ ହୋଇଛି । ଚୀନ, ଜାପାନ, ଭାରତୀୟ ରିଜର୍ଭ ବ୍ୟାଙ୍କ, ଇଉରୋପିଆନ ରାଷ୍ଟ୍ର ସମୂହ, ଓ ଆମେରିକାର ଫେଡେରାଲ୍ ରିଜର୍ଭ ସୁନା କିଣିବା ଅବ୍ୟାହତ ରଖିଛନ୍ତି ।
ଏସବୁ କେନ୍ଦ୍ରୀୟ ବ୍ୟାଙ୍କଗୁଡ଼ିକଙ୍କ ପାଖରେ ଏବେ ମହଜୁଦ ରହିଛି ୨୪୪ ଟନ୍ ସୁନା । ସେପଟେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଜିଦଖୋର ମନୋବୃତ୍ତି ଯୋଗୁ ସେଠାକାର ଅର୍ଥନୀତି ଧୀରେ ଧୀରେ ମାନ୍ଦାବସ୍ଥା ଭିତରକୁ ଠେଲି ହୋଇଯାଉଛି । ଯେଉଁଥିପାଇଁ ଅଂଶଧନ କାରବାରରେ କ୍ଷତି ଆଶଙ୍କା କରି ନିବେଶକ ସେୟାର ମାର୍କେଟ୍ରେ ପୁଞ୍ଜି ନ ଖଟାଇ ବାସ୍ତବ ସୁନାରେ ପୁଞ୍ଜି ନିବେଶ କରୁଛନ୍ତି ।
ଯାହାଯୋଗୁ ସୁନା ଚାହିଦା ଅଚାନକ ବୃଦ୍ଧି ପାଇଛି । ପୋଲାଣ୍ଡ କେନ୍ଦ୍ରୀୟ ବ୍ୟାଙ୍କ ଏକାକୀ ୧୨ ଟନ୍ ସୁନା କିଣି ମହଜୁଦ ରଖିଲାଣି । ଯାହାକି ୟୁରୋପିଆନ୍ ୟୁନିୟନ୍ କେନ୍ଦ୍ରୀୟ ବ୍ୟାଙ୍କ ରଖିଥିବା ସୁନାଠାରୁ ଅଧିକ । ଡଲାର ତୁଳନାରେ ଟଙ୍କା ମୂଲ୍ୟ ପୁଣି ଥରେ ବି ହ୍ରାସ ଘଟିଛି । ବଜାର ବିଶେଷଜ୍ଞଙ୍କ ଆକଳନ ଆଗାମୀ ଦିନରେ ସୁନା ଦର ଆହୁରି ବଢିବ । ୨୪ କ୍ୟାରେଟ୍ ସୁନା ୧ ଲକ୍ଷ ୧୫ ହଜାର ପାର କରିପାରେ ।
