ବାତ୍ୟା ଓ ବନ୍ୟାରେ ଗଞ୍ଜାମ, ଗଜପତି ଏବଂ କନ୍ଧମାଳ ଜିଲ୍ଲା ବିଶେଷ କ୍ଷତିଗ୍ରସ୍ତ ହୋଇଛି। କେନ୍ଦ୍ରୀୟ ଟିମ୍ ଆସି ଏହାର ସ୍ଥିତି ଅନୁଧ୍ୟାନ କରିଛନ୍ତି। ଏହା ପରେ ରାଜ୍ୟ ସରକାରଙ୍କ ବୈଠକରେ କେନ୍ଦ୍ରୀୟ କମିଟି ଆଗରେ ୨ ହଜାର ୫୨୬ କୋଟିର କ୍ଷୟକ୍ଷତି ସହାୟତା ପାଇଁ ଦାବୀ ରଖିଲା ଓଡିଶା।ଏହା ସହ ୩ ଜିଲ୍ଲାରେ ବାତ୍ୟା ବନ୍ୟାରେ ସ୍ଥାୟୀ ସମାଧାନ ପାଇଁ ୧୦ ହଜାର କୋଟିର ସ୍ୱତନ୍ତ୍ର ସହାୟତା ନେଇ ମଧ୍ୟ ଦାବୀ ରଖାଗଲା। ୮ ରୁ ୧୦ ଦିନ ମଧ୍ୟରେ ଚୂଡାନ୍ତ ରିପୋର୍ଟ ଆସିବା ପରେ କେନ୍ଦ୍ର ସରକାରଙ୍କ ପାଖରେ ଦାଖଲ କରାଯିବ ବୋଲି ଏସଆରସି ରାଜେଶ ପ୍ରଭାକର ପାଟିଲ କହିଛନ୍ତି।
ସ୍ଥିତି ଅନୁଧ୍ୟାନ ପରେ ଗୁରୁବାର ଲୋକ ସେବା ଭବନରେ ମୁଖ୍ୟ ଶାସନ ସଚିବଙ୍କ ସହ ଏବଂ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଥିଲେ ୮ ଜଣିଆ କେନ୍ଦ୍ରୀୟ କମିଟି। ସ୍ଥିତି ଅନୁଧ୍ୟାନ ବେଳେ ଅତିରିକ୍ତ କ୍ଷତି ହୋଇଥିବା କେନ୍ଦ୍ରୀୟ ଟିମ ଉପଲବ୍ଧି କରିଛନ୍ତି। ବିଭିନ୍ନ ବିଭାଗର ସଚିବ ମାନେ ମଧ୍ୟ ବୈଠକରେ ସାମିଲ ଥିଲେ ବୋଲି ଏସଆରସି କହିଛନ୍ତି।
