ସଂଚାର ବ୍ୟୁରୋ: ଆସନ୍ତା ଶୀତ ଅଧିବେଶନ ବେଶ ସରଗରମ ହେବ । ବିଭିନ୍ନ ପ୍ରସଙ୍ଗରେ ବିରୋଧୀ ଶାସକ ଦଳକୁ ଘେରିବାକୁ ରଣନୀତି ପ୍ରସ୍ତୁତ କରୁଥିବାବେଳେ ବିଜେଡି କହିଛି, ସରକାରଙ୍କ ବିରୁଦ୍ଧରେ ମାଳମାଳ ପ୍ରସଙ୍ଗ ରହିଛି । ନାରୀ ନିର୍ଯାତନା, ଆଇନ ଶୃଙ୍ଖଳା , ବିଭିନ୍ନ ପରୀକ୍ଷାରେ ବିଭ୍ରାଟ, ପୋଲିସ ବିଭାଗରେ ନିଯୁକ୍ତି ଚୋରି, ଚାଷୀ ସମସ୍ୟା, ବଜେଟ ଅର୍ଥ ସଠିକ୍ ଭାବେ ଖର୍ଚ୍ଚ ନକରିବା ଆଦି ପ୍ରସଙ୍ଗରେ ସରକାରଙ୍କୁ ବିଜେଡି ଘେରିବ । ବଜେଟ ଅର୍ଥ ଖର୍ଚ୍ଚ ନକରି କଣ ପାଇଁ ଅତିରିକ୍ତ ବଜେଟ ଆଣୁଛନ୍ତି ବୋଲି ଏହି ଅବସରରେ ପ୍ରଶ୍ନ କରିଛନ୍ତି ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ । ସେପଟେ କଂଗ୍ରେସ ବିଧାନସଭାରେ ନାରୀ ନିର୍ଯାତନା ସହ ରାଜ୍ୟରେ ବିପର୍ଯ୍ୟସ୍ତ ଆଇନ ଶୃଙ୍ଖଳାକୁ ମଧ୍ଯ ବଡ଼ ପ୍ରସଙ୍ଗ କରିବ । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ କହିଛନ୍ତି, ବିଜେପି ସରକାର ଆସିବା ପରେ ରାଜ୍ୟରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇଛି । ମହିଳାମାନେ ରାଜ୍ୟରେ ଅସୁରକ୍ଷିତ ହୋଇପଡିଛନ୍ତି । ବିଶେଷକରି ଦଳିତ, ଆଦିବାସୀ, ପଛୁଆ ବର୍ଗର ମହିଳାମାନେ ଅସୁରକ୍ଷିତ ହୋଇ ପଡିଛନ୍ତି । ଏ ପ୍ରସଙ୍ଗକୁ ଗୃହରେ ଉଠାଇ ସରକାରଙ୍କୁ ଜବାବ ମାଗିବ ଦଳ । ନିକଟରେ ଘଟିଥିବା ବାଘମାରି ପ୍ରସଙ୍ଗ ବି ଦଳ ଉଠାଇବ । ବଜେଟ ଅର୍ଥ ସରକାର ଖର୍ଚ୍ଚ କରିପାରିନାହାନ୍ତି । କାହିଁକି ଗାଁ ଗାଁ ରେ ଉନ୍ନୟନ କାମ ଠପ୍ ହୋଇଛି ସେ ପ୍ରଶ୍ନ ବି ଦଳ ପଚାରିବ । ଆସନ୍ତା କାଲି କଂଗ୍ରେସ ବିଧାୟକ ଦଳ ବୈଠକ ବସି ବିଧାନସଭା ରଣନୀତି ପ୍ରସ୍ତୁତ କରାଯିବ ବୋଲି କହିଛନ୍ତି ରାମଚନ୍ଦ୍ର ।
