ସଂଚାର ବ୍ୟୁରୋ: ଅଭିନବ ଉପାୟରେ ଚୋରି କଲେ କିନ୍ନର । ଆଶୀର୍ବାଦ ଦେଇ ଲୁଟିନେଲେ ସୁନା ଅଳଙ୍କାର । ନୂଆପଡା ଜିଲ୍ଲାରେ ଏଭଳି ଏକ ଚୋରି ଘଟଣା ନଜରକୁ ଆସିଛି । ଖଡିଆଳ ଥାନା ତୁକୁଲା ଗାଁରେ ଆକାଶ ଖେମକାଙ୍କ ନବଜାତ ଶିଶୁକୁ ଆଶୀର୍ବାଦ ଦେବାକୁ ଆସି ସୁନା ଚେନ ଚୋରି କରିନେଇଥିବା ଅଭିଯୋଗ ହୋଇଛି । ଶିଶୁର ମା ସୋନିଆ ଖେମକାଙ୍କ ଠାରୁ ୩ଭରିର ସୁନା ଚେନ୍ ଲୁଟି ନେଇଥିବା ନେଇ ଖଡିଆଳ ଥାନାରେ ଅଭିଯୋଗ ହୋଇଛି । ବ୍ୟବସାୟୀଙ୍କ ଘରକୁ ଏକ କାର ରେ ୩ଜଣ କିନ୍ନର ଆସିଥିଲେ। ଏମାନେ ପୁର୍ବରୁ ମଧ୍ୟ ଦୁଇଥର ଆସିଥିବାରୁ ବ୍ୟବସାୟୀଙ୍କ ଘରେ କିନ୍ନରଙ୍କୁ ମହିଳା ମାନେ ଅତିଥି ସତ୍କାର କରିଥିଲେ। ଏହା ପରେ ନବଜାତ ଶିଶୁକୁ ଆଶୀର୍ବାଦ ଓ ଶିଶୁ ର ମାଙ୍କୁ ଝଡା ଫୁଙ୍କା କରିଦେବା କହି ଗୋଟିଏ ଢାଳ ପାଣି ମାଗିଥିଲେ । ଶିଶୁ ଓ ମାକୁ ଛାଡି ଅନ୍ୟ ମହିଳାଙ୍କୁ ଚାଲିଯିବା ପାଇଁ କହି ସୁନା ଚେନ ଝାଂପି ନେଇଥିଲେ । ଘର ସମ୍ମୁଖରେ ସ୍ଥାନୀୟ ଲୋକ କେହି ନ ଥିବାରୁ କିନ୍ନର ମାନେ ଘଟଣା ସ୍ଥଳରୁ ଗାଡ଼ିରେ ଫେରାର ମାରିଥିଲେ। ଘଟଣାର ଅଭିଯୋଗ ପରେ ପୋଲିସ ସିସିଟିଭି ଫୁଟେଜକୁ ନେଇ ତଦନ୍ତ କରୁଛି।
