ସଂଚାର ବ୍ୟୁରୋ: ବଢ଼ିଲା କରୋନା କାୟା। ମୁମ୍ବାଇରେ କରୋନାରେ ୨ ଜଣଙ୍କ ମୃତ୍ୟୁ। ମୁମ୍ବାଇର କେଇଏମ ହସ୍ପିଟାଲରେ ୨ ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି। ୨ ଜଣଙ୍କ ମୃତ୍ୟୁ ପରେ ମୁମ୍ବାଇରେ ସତର୍କତା ବ୍ଯବସ୍ଥା ଗ୍ରହଣ କରାଯାଇଛି। ମୃତକଙ୍କ ମଧ୍ଯରେ ଅଛନ୍ତି ୫୯ ବର୍ଷ ବୟସ୍କା ଜଣେ ମହିଳା ଓ ଜଣେ ୧୪ ବର୍ଷର ବାଳିକା। ମହିଳା ଜଣକ କର୍କଟ ରୋଗରେ ପୀଡ଼ିତ ଥିବାବେଳେ ବାଳିକା ଜଣକ କିଡନୀ ରୋଗରେ ଆକ୍ରାନ୍ତ ଥିଲେ। ଉଭୟେ କରୋନାରେ ଆକ୍ରାନ୍ତ ଥିଲେ। ତେବେ ଏହି ଦୁଇ ଘଟଣା କୋଭିଡ ସମ୍ପର୍କିତ ନୁହେଁ ବୋଲି କହିଛନ୍ତି ଡାକ୍ତର। ତେଣେ ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ୨୫୭ ବୋଲି କୁହାଯାଇଛି। କେରଳରେ ୬୯, ମହାରାଷ୍ଟ୍ରରେ ୪୪, ତାମିଲନାଡୁରେ ୩୪, କର୍ଣ୍ଣାଟକରେ ୮, ଗୁଜରାଟରେ ୬, ଦିଲ୍ଲୀରେ ୩ ଜଣ ସଂକ୍ରମିତ ହୋଇଥିବା ସୂଚନା ମିଳିଛି। ଏହା ସହ ହରିୟାଣା, ରାଜସ୍ଥାନ ଓ ସିକ୍କିମରେ ଜଣେ ଲେଖାଏଁ ସଂକ୍ରମିତ ଚିହ୍ନଟ ହୋଇଛନ୍ତି। ସେପଟେ ହଂକଂ ଓ ସିଙ୍ଗାପୁରରେ କରୋନା ନିଜ କାୟା ବିସ୍ତାର କରିବାରେ ଲାଗିଛି। ହସ୍ପିଟାଲରେ ଭର୍ତ୍ତି ହେଉଥିବା ରୋଗୀଙ୍କ ସଂଖ୍ୟା ବି ବଢୁଛି। ଅନ୍ୟପଟେ ଏହା କୋଭିଡର ନୂଆ ଭାରିଆଣ୍ଟ ନୁହେଁ, ଏହା ଓମିକ୍ରନର ସବଭାରିଆଣ୍ଟ। ଏନେଇ କେନ୍ଦ୍ର ସରକାର ଏ ଯାଏଁ କୌଣସି ମାର୍ଗଦର୍ଶିକା ଜାରି କରି ନାହାନ୍ତି ବୋଲି କହିଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ। ଓଡ଼ିଶାରେ କେହି ଚିହ୍ନଟ ହେଲେ, ଜେନମ ସିକୁଏନସିଂ କରାଯିବ। ତାମିଲନାଡୁ, କେରଳ, ଦିଲ୍ଲୀରେ ଯାହା ମାମଲା ଆସିଛି ତାହା ସେହି ସବଭାରିଆଣ୍ଟ ବୋଲି କହିଛନ୍ତି ଡାକ୍ତର ନୀଳକଣ୍ଠ ଦାସ।
