ତାତିରୁ ମିଳିବ ଆଶ୍ଵସ୍ତି। ଏଥର ସଅଳ ଆସିବ ମୌସୁମୀ। ଦେଶକୁ ଶୀଘ୍ର ମୌସୁମୀ ଛୁଇଁବା ସମ୍ଭାବନା। ମେ ୨୭ ବେଳକୁ ଦକ୍ଷିଣ-ପଶ୍ଚିମ ମୌସୁମୀ କେରଳ ଛୁଇଁବ। ତେବେ ମଡେଲଜନିତ ତ୍ରୁଟି ପାଇଁ ୪ ଦିନ ଆଗପଛ ହୋଇପାରେ। ଏନେଇ IMD ପକ୍ଷରୁ ଆକଳନ କରାଯାଇଛି।
ସାଧାରଣତଃ ଦକ୍ଷିଣ-ପଶ୍ଚିମ ମୌସୁମୀ ବାୟୁ ମେ ୧୮ରୁ ୧୯ ଭିତରେ ଆଣ୍ଡାମାନ ସାଗର ଛୁଇଁଥାଏ । ଜୁନ୍ ୧ ତାରିଖ ବେଳକୁ କେରଳ ପାଖରେ ଦେଶର ମୁଖ୍ୟ ଭୂଖଣ୍ଡକୁ ସ୍ପର୍ଶ କରେ । କେରଳ ଛୁଇଁବାର ୧୦ରୁ ୧୨ ଦିନ ମଧ୍ୟରେ ମୌସୁମୀ ବାୟୁ ଓଡ଼ିଶାକୁ ଅଗ୍ରସର ହୋଇଥାଏ ।
ପାଣିପାଗ ବିଶେଷଜ୍ଞ ଏନେଇ ଏକ୍ସରେ ଲେଖିଛନ୍ତି ଯେ, ୨୦୨୪ ମସିହାରେ ମୌସୁମୀ ବାୟୁ ମେ’ ୩୦ ତାରିଖରେ କେରଳ ଛୁଇଁଥିବା ବେଳେ ୨୦୨୩ ମସିହାରେ ଜୁନ୍ ୮ ତାରିଖ, ୨୦୨୨ ମସିହାରେ ମେ’ ୨୯ ତାରିଖ, ୨୦୨୧ ମସିହାରେ ଜୁନ୍ ୩ ତାରିଖ, ୨୦୨୦ ମସିହାରେ ଜୁନ୍ ୧ ତାରିଖରେ କେରଳ ଛୁଇଁଥିଲା । ପୂର୍ବବର୍ଷ ଭଳି ଚଳିତ ବର୍ଷ ମଧ୍ୟ ମୌସୁମୀ ବାୟୁ ଆକଳନ ଅନୁଯାୟୀ ମେ ୨୭ରେ କେରଳ ଛୁଇଁବାର ସମ୍ଭାବନା ରହିଛି।
ଏଥର ଦେଶକୁ ଶୀଘ୍ର ମୌସୁମୀ ଛୁଇଁବା ସମ୍ଭାବନା ରହିଛି। ରାଜ୍ୟରେ ଠିକ୍ ସମୟରେ ମୌସୁମୀ ବାୟୁ ପହଞ୍ଚିବ । ମୌସୁମୀ ବର୍ଷା ପରିମାଣ ସ୍ୱାଭାବିକ ରହିବ । ଆଗାମୀ ଜୁନ୍ ମାସରେ ବର୍ଷା ସ୍ୱାଭାବିକ ରହିବ । ଜୁଲାଇ ମାସ ଅଧାରୁ ଅଗଷ୍ଟ ମାସ ଅଧା ଯାଏ ବର୍ଷା କମିବ । ଅକ୍ଟୋବର ମାସରେ ବର୍ଷା ପରିମାଣ ଅଧିକ ରହିବ । ଏନେଇ ପୂର୍ବରୁ ଆକଳନ କରାଯାଇଥିଲା।
