ଆସନ୍ତାକାଲି ବାଲେଶ୍ୱର ଜିଲ୍ଲା ନୀଳଗିରି ଗସ୍ତରେ ଯିବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ମୁଖ୍ୟମନ୍ତ୍ରୀଙ୍କ ଏହି ଗସ୍ତକୁ ନେଇ ନୀଳଗିରିରେ ପ୍ରଶାସନିକ ପ୍ରସ୍ତୁତି ଜୋରଦାର ହୋଇଛି। ଏହି ଗସ୍ତ ସମୟରେ ଭତ୍ତା ବଣ୍ଟନ ସହ ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଅନ୍ୟାନ୍ୟ କାର୍ଯ୍ୟକ୍ରମ ରହିଛି
ସୂଚନା ଅନୁଯାୟୀ, ସାଂସଦ ପ୍ରତାପ ଷଡ଼ଙ୍ଗୀଙ୍କ ୭୨ତମ ଜନ୍ମଦିନ ଅବସରରେ ଏକ ମେଗା ରକ୍ତଦାନ ଶିବିର ଓ ମହିଳାଙ୍କୁ ସିଲେଇ ମେସିନ୍ ବଣ୍ଟନ କାର୍ଯ୍ୟକ୍ରମ ଆୟୋଜନ ହେଉଛି। ସାଂସଦଙ୍କ ଅନୁରୋଧ କ୍ରମେ ମୁଖ୍ୟମନ୍ତ୍ରୀ ଏହି କାର୍ଯ୍ୟକ୍ରମରେ ଯୋଗଦେବାକୁ ସମ୍ମତି ଦେଇଛନ୍ତି । ଏହି ଅବସରରେ ନୀଳଗିରି ବ୍ଲକର ୨୫ଟି ସ୍ୱୟଂ ସହାୟକ ଗୋଷ୍ଠୀର ମହିଳାଙ୍କୁ ସିଲେଇ ମେସିନ୍ ପ୍ରଦାନ କରାଯିବ । ଏହାଦ୍ୱାରା ମହିଳାମାନେ ଆତ୍ମନିର୍ଭରଶୀଳ ହେବା ସହ ନିଜର ରୋଜଗାର ବୃଦ୍ଧି କରିପାରିବେ ବୋଲି ଆଶା ରହିଛି ।
ମୁଖ୍ୟମନ୍ତ୍ରୀ ପ୍ରଥମେ ନୀଳଗିରି କଲେଜ ପରିସରରେ ନିର୍ମିତ ଅସ୍ଥାୟୀ ହେଲିପ୍ୟାଡ୍ରେ ହେଲିକପ୍ଟର ଯୋଗେ ଅବତରଣ କରିବେ। ପରେ ସଡ଼କ ପଥରେ ଡାକବଙ୍ଗଳାରେ ପହଞ୍ଚିବେ। ସେଠାରେ ଆୟୋଜିତ ରକ୍ତଦାନ ଶିବିରରେ ଯୋଗଦେଇ ରକ୍ତଦାତାଙ୍କୁ ଉତ୍ସାହିତ କରିବେ । ତେବେ ଗସ୍ତର ନିର୍ଦ୍ଦିଷ୍ଟ ସମୟ ଏଯାଏଁ ଚୂଡ଼ାନ୍ତ ହୋଇନାହିଁ ।
