ସଂଚାର ବ୍ୟୁରୋ: ରାଜ୍ୟରେ ବିଜେପି ସରକାର ଗଠନ ହେଲା ପରଠାରୁ, ମନ୍ତ୍ରିମଣ୍ଡଳରେ ଗୋଟିଏ ବି ଅଦଳବଦଳ ହୋଇନି । ଏବେ ବି ମୋହନ ସରକାରରେ ୬ଟି ମନ୍ତ୍ରୀ ପଦ ଫାଙ୍କା ପଡ଼ିଥିବାବେଳେ, ଅନେକ ନେତା ମନ୍ତ୍ରୀ ହେବାକୁ ଆଶା ବାନ୍ଧି ବସିଛନ୍ତି । ଆଉ ଏତିକି ବେଳେ ମୁଖ୍ୟମନ୍ତ୍ରୀଙ୍କ ସହିତ ରାଜ୍ୟ ବିଜେପି ମୁଖିଆଙ୍କ ଦିଲ୍ଲୀ ଡାକରା ଆସିଛି । କୁହାଯାଉଛି କି ଦିଲ୍ଲୀରେ ମନ୍ତ୍ରୀ ମଣ୍ଡଳ ସଂପ୍ରସାରଣ ଏବଂ ଅଦଳବଦଳ ହେବା ନେଇ ହୋଇପାରେ ଆଲୋଚନା । କିଛି ମନ୍ତ୍ରୀଙ୍କ ପାଇଁ ସରକାର ବଦନାମ ହେଉଥିବା ବାରମ୍ବର ଚର୍ଚ୍ଚା ହେଉଛି । ଏଣୁ କିଛି ଦାଗୀ ମନ୍ତ୍ରୀ ମଣ୍ଡଳରୁ ବାଦ ପଡ଼ିପାରନ୍ତି ବୋଲି ଚର୍ଚ୍ଚା ହେଉଥିବାବେଳେ କିଛି ନୂଆ ନେତା ପ୍ରଥମଥର ପାଇଁ ମନ୍ତ୍ରୀ ହୋଇପାରନ୍ତି । ସେପଟେ ନିଗମ ଆଉ ବୋର୍ଡ ନିଯୁକ୍ତି ନେଇ ମଧ୍ୟ ତାରିଖ ଘୁଞ୍ଚି ଘୁଞ୍ଚି ଚାଲିଛି । ଯେହେତୁ ଦଳ ଏଥର ପ୍ରଥମ ଥର ପାଇଁ ସରକାରକୁ ଆସିଛି, ତେଣୁ କାହାକୁ ବୋର୍ଡ, ନିଗମ ଆଉ ମନ୍ତ୍ରିମଣ୍ଡଳରେ ସୁଯୋଗ ମିଳିବ, ସେନେଇ ଦଳ ଭାବିଚିନ୍ତି ନିଷ୍ପତ୍ତି ନେଉଛି । ଆଉ ଏହି କାରଣରୁ ମନ୍ତ୍ରିମଣ୍ଡଳ ସହିତ ନିଗମ, ବୋର୍ଡ ନିଯୁକ୍ତି ବିଳମ୍ବ ହେଉଛି ବୋଲି ଚର୍ଚ୍ଚା ହେଉଛି ।
ଏହା ପୂର୍ବରୁ ମଧ୍ୟ ଗଲା ମାସରେ ରାଜ୍ୟ ବିଜେପି ସଭାପତିଙ୍କ ସହିତ ମୁଖ୍ୟମନ୍ତ୍ରୀ ଦିଲ୍ଲୀ ଗସ୍ତରେ ଯାଇଥିଲେ । ଆଉ ଏତିକି ବେଳେ ଗୋଟିଏ ଫାଇଲକୁ ନେଇ ଚର୍ଚ୍ଚା ବଢ଼ିଥିଲା । ମୋଦୀଙ୍କ ସହ ସାକ୍ଷାତ ବେଳେ, ମୁଖ୍ୟମନ୍ତ୍ରୀ ମୋହନ ମାଝୀ ଗୋଟିଏ ଫାଇଲ୍ ଧରି ବସିଥିଲେ । ଯାହାପରେ ଚର୍ଚ୍ଚା ବଢିଲା ଯେ, ମନ୍ତ୍ରିମଣ୍ଡଳରେ କିଏ କିଏ ସ୍ଥାନ ପାଇବେ, ସେନେଇ ମୋଦୀଙ୍କଠାରୁ ଗ୍ରୀନ୍ ସିଗନାଲ୍ ମିଳିସାରିଛି । ହେଲେ ତା ପରେ ପରେ ବାଲେଶ୍ୱର ଆଉ ବଳଙ୍ଗା ଘଟଣାକୁ ନେଇ ଓଡ଼ିଶା ରାଜନୀତି ଯେମିତି ସରଗରମ ହୋଇଛି, ଆଉ ଏତିକି ବେଳେ ଓଡ଼ିଶା ନେତାଙ୍କୁ ଦିଲ୍ଲୀ ଡାକରା ବଡ଼ ରାଜନୈତକ ଚର୍ଚ୍ଚାକୁ ଖୋରାକ ଯୋଗାଇଛି ।
