ସଂଚାର ବ୍ୟୁରୋ: ମହାରାଷ୍ଟ୍ରରେ ଫଡନବିସ ରାଜ୍ । ତୃତୀୟ ଥର ଲାଗି ମୁଖ୍ଯମନ୍ତ୍ରୀ ଭାବେ ଶପଥ ନେଇଛନ୍ତି ବିଜେପି ହେଭିୱେଟ ଦେବେନ୍ଦ୍ର ଫଡନବିସ। କାର୍ଯ୍ଯକାରୀ ହୋଇଛି 1+2 formula। ପୂର୍ବତନ ମୁଖ୍ଯମନ୍ତ୍ରୀ ଏକନାଥ ସିନ୍ଦେ ହୋଇଛନ୍ତି ଉପମୁଖ୍ଯମନ୍ତ୍ରୀ। ଏହା ସହ ଉପମୁଖ୍ଯମନ୍ତ୍ରୀ ଭାବେ ଶପଥ ନେଇଛନ୍ତି ଏନସିପି ନେତା ଅଜିତ ପାୱାର। ଏହା ସହ ମହାୟୁତିରେ ଚାଲିଥିବା ସସପେନ୍ସର ବି ଘଟିଛି ଅବସାନ। ଆଜି ମୁମ୍ବାଇ ଆଜାଦ ମଇଦାନରେ ହୋଇଥିଲା ଶପଥ ଗ୍ରହଣ ସମାରୋହ। ସାମିଲ ହୋଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ବିଜେପି ସଭାପତି ଜେ.ପି. ନଡ୍ଡା, ବହୁ କେନ୍ଦ୍ରମନ୍ତ୍ରୀ ଓ ବିଭିନ୍ନ ବିଜେପିଶାସିତ ରାଜ୍ଯର ମୁଖ୍ଯମନ୍ତ୍ରୀ। ଉତ୍ସବରେ ବଲିଉ଼ଡ ଅଭିନେତା ଶାହରୁଖ ଖାଁ, ସଲମାନ ଖାଁ, ରଣବୀର କପୁର, ଶିଳ୍ପପତି ମୁକେଶ ଅମ୍ବାନୀ, ଅନିଲ ଅମ୍ବାନୀ, ଅନନ୍ତ ଅମ୍ବାନୀ, କୁମାର ମଙ୍ଗଳମ ବିର୍ଲା, କ୍ରିକେଟର ସଚିନ ତେନ୍ଦୁଲକର ପ୍ରମୁଖ ଯୋଗଦେଇଥିଲେ। ଉତ୍ସବ ଲାଗି ମହାୟୁତିର ହୋଇଥିଲା ମେଗା ସୋ। ସାମିଲ ହୋଇଥିଲେ ପ୍ରାୟ ୪୦ ହଜାର ଦର୍ଶକ। ନିର୍ବାଚନରେ ବିଜେପି ୧୩୨ ଆସନ ପାଇବା ପରେ ବିଜେପିରୁ ହିଁ କେହି ମୁଖ୍ଯମନ୍ତ୍ରୀ ହେବା ନେଇ ଚର୍ଚ୍ଚା ଜୋର ଧରିଥିଲା। ମହାୟୁତି ମେଣ୍ଟରେ ଶିବସେନା ୫୭ ଓ ଏନସିପି ୪୧ ଆସନ ପାଇଥିଲା। ଗତକାଲି ବିଜେପି ବିଧାୟକ ଦଳ ବୈଠକରେ ଫଡନବିସଙ୍କୁ ସର୍ବସମ୍ମତ ନେତା ଭାବେ ଘୋଷଣା କରାଯାଇଥିଲା। ସେପଟେ ମହାୟୁତି ସରକାରଙ୍କୁ ନେଇ କଟାକ୍ଷ କରିଛନ୍ତି ଶିବସେନା ୟୁବିଟି ନେତା ସଞ୍ଜୟ ରାୱତ। ସେ କହିଛନ୍ତି- ସିନ୍ଦେ ଯୁଗର ଶେଷ ହୋଇଛି। ସେ ଆଉ କେବେ ବି ମୁଖ୍ଯମନ୍ତ୍ରୀ ହୋଇପାରିବେ ନାହିଁ। ଏହା ସହ ସିନ୍ଦେଙ୍କ ଦଳକୁ ବିଜେପି ଭାଙ୍ଗିପାରେ ବୋଲି ଆଶଙ୍କା କରିଛନ୍ତି ସଞ୍ଜୟ।
