ସଂଚାର ବ୍ୟୁରୋ: କର୍ଣ୍ଣାଟକ ଉପମୁଖ୍ୟମନ୍ତ୍ରୀ ଡି.କେ. ଶିବକୁମାରଙ୍କୁ ନେଇ ବଢିଲା ଚର୍ଚ୍ଚା । ମୁଖ୍ୟମନ୍ତ୍ରୀ ହେବା ନେଇ ଶିବକୁମାରଙ୍କୁ କେହି ଅଟକାଇପାରିବେ ନାହିଁ ବୋଲି ବରିଷ୍ଠ କଂଗ୍ରେସ ନେତା ବୀରାପ୍ପା ମୋଇଲି ସୂଚନା ଦେବା ପରେ ଏନେଇ ଚର୍ଚ୍ଚା ଜୋରଧରିଛି । ତେଣେ ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କୁ ଭେଟିଛନ୍ତି ଶିବକୁମାର । ବେଙ୍ଗାଳୁରୁରେ ନୂଆ କଂଗ୍ରେସ ଅଫିସ ଉଦଘାଟନ ଅବସରରେ ଦୁଇ ନେତାଙ୍କ ମଧ୍ଯରେ ଭେଟଘାଟ ହୋଇଥିଲା । ଶିବକୁମାରଙ୍କ ଜଣେ ପ୍ରଶଂସକ ହେଉଛନ୍ତି ମୋଇଲି । ଦଳକୁ ମଜଭୁତ କରିବାରେ ଶିବକୁମାରଙ୍କ ଭୂମିକା ଅଧିକ ରହିଛି । ଶିବକୁମାର ମୁଖ୍ଯମନ୍ତ୍ରୀ ହୁଅନ୍ତୁ ବୋଲି ଲୋକେ ଚାହୁଁଛନ୍ତି ଏବଂ ତାଙ୍କର ଭାଗ୍ୟ ଅନୁସାରେ ସେ ମୁଖ୍ୟମନ୍ତ୍ରୀ ହେବେ ବୋଲି ମୋଇଲି କହିଥିଲେ । ଏପରକି ଶିବକୁମାରଙ୍କ ବିରୋଧରେ କୋଟି କୋଟି ଟଙ୍କା ଖର୍ଚ୍ଚ କଲେ ବି କେହି ତାଙ୍କୁ ଅଟକାଇପାରିବେ ନାହିଁ କହିଥିଲେ ମୋଇଲି । ତେଣେ ମୋଇଲିଙ୍କ ମନ୍ତବ୍ୟ ତାଙ୍କର ବ୍ୟକ୍ତିଗତ ବୋଲି କହିଛନ୍ତି କର୍ଣ୍ଣାଟକର ବରିଷ୍ଠ ମନ୍ତ୍ରୀ କେ.ଏନ. ରାଜନ୍ନା । ସେହିପରି ମୋଇଲିଙ୍କ ମତ ତାଙ୍କ ବ୍ୟକ୍ତିଗତ ବୋଲି କହିଛନ୍ତି ଶିବକୁମାର । ସେପଟେ ଆସନ୍ତା ଡିସେମ୍ବରରେ ଶିବକୁମାର ମୁଖ୍ୟମନ୍ତ୍ରୀ ହେବା ନେଇ ଚର୍ଚ୍ଚା ଜୋର ଧରିଛି । ଅନ୍ତତଃ ଆସନ୍ତା ୨୦୨୮ରେ ହେବାକୁ ଥିବା ବିଧାନସଭା ନିର୍ବାଚନ ପର୍ଯ୍ୟନ୍ତ ଶିବକୁମାର ମୁଖ୍ୟମନ୍ତ୍ରୀ ରହିବେ ବୋଲି କଂଗ୍ରେସ ମହଲରେ ଆଲୋଚନା ହେଉଛି । ଗତ ମେ ୨୦୨୩ରୁ ମୁଖ୍ୟମନ୍ତ୍ରୀ ଅଛନ୍ତି ସିଦ୍ଧରମୈୟା ।
