ସଂଚାର ବ୍ୟୁରୋ : କର୍ଣ୍ଣାଟକରେ ହେବ ନାହିଁ ମୁଖ୍ୟମନ୍ତ୍ରୀ ପରିବର୍ତ୍ତନ। ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେଙ୍କୁ ଭେଟିବା ପରେ ଏହା କହିଛନ୍ତି କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା। ମୁଖ୍ୟମନ୍ତ୍ରୀ ପରିବର୍ତ୍ତନ ନେଇ ଯାହା ଚର୍ଚ୍ଚା ଚାଲିଛି ତାହା ଏକ ଉଡ଼ାଖବର ବୋଲି ସେ କହିଛନ୍ତି। ସେ କହିଛନ୍ତି ଖଡଗେଙ୍କ ସହ ନେତୃତ୍ବ ପରିବର୍ତ୍ତନ କିମ୍ବା କ୍ୟାବିନେଟ ପ୍ରସଙ୍ଗରେ କୌଣସି ଆଲୋଚନା ହୋଇନାହିଁ। ଏନେଇ ଯାହା ଆଲୋଚନା ହେଉଛି ତାହା କେବଳ ମନଗଢା ଖବର। ବିଧାୟକମାନେ ଦିଲ୍ଲୀ ଯାଆନ୍ତୁ- ସେଥିରେ କିଛି ଆପତ୍ତି ନାହିଁ। ହାଇକମାଣ୍ଡ ଯାହା ନିଷ୍ପତ୍ତି ନେବେ ତାହା ହିଁ ଯଥାର୍ଥ ବୋଲି ସେ କହିଛନ୍ତି। ଗତ ୨୧ ତାରିଖରେ ମୁଖ୍ୟମନ୍ତ୍ରୀ ପ୍ରସଙ୍ଗେର ଉପମୁଖ୍ୟମନ୍ତ୍ରୀ ଡି.କେ. ଶିବକୁମାର କହିଥିଲେ ଏକ ଗୋଷ୍ଠୀ ଗଠନ କରିବା ତାଙ୍କ ରକ୍ତରେ ନାହିଁ।
ସମସ୍ତ ୧୪୦ ବିଧାୟକ ତାଙ୍କର। କର୍ଣ୍ଣାଟକ ନିର୍ବାଚନ କଂଗ୍ରେସ ଜିତିବା ପରଠାରୁ ଅଢେଇ ବର୍ଷ ପାଇଁ ସିଦ୍ଧରମେୟା ମୁଖ୍ୟମନ୍ତ୍ରୀ ପଦରେ ରହିବା ପାଇଁ ହାଇକମାଣ୍ଡ ସ୍ତରରେ ନିଷ୍ପତ୍ତି ହୋଇଥିଲା । ଏବେ ଅଢେଇ ବର୍ଷ ପୁରିଗଲା ପରେ ଉପ ମୁଖ୍ୟମନ୍ତ୍ରୀ ପଦରେ ଥିବା ଡିକେ ଶିବ କୁମାରଙ୍କୁ ମୁଖ୍ୟମନ୍ତ୍ରୀ ଆସନରେ ଅଭିଷିକ୍ତ କରିବାକୁ ଦଳ ଭିତରେ ଦାବି ଜୋର ଧରିଛି । ଏହାକୁ ନେଇ ଉପମୁଖ୍ୟମନ୍ତ୍ରୀ ଡି.କେ. ଶିବକୁମାରଙ୍କୁ ସମର୍ଥନ କରି ୧୦ରୁ ଅଧିକ ବିଧାୟକ ଦିଲ୍ଲୀରେ ଡେରା ପକାଇଥିଲେ । ଅଢେଇ ବର୍ଷ ପରେ ମୁଖ୍ୟମନ୍ତ୍ରୀ ପରିବର୍ତ୍ତନ କରିବା ଲାଗି ଯେଉଁ ଘୋଷଣା ହୋଇଥିଲା ତାହାକୁ କାର୍ଯ୍ୟକାରୀ କରିବା ଲାଗି ସେମାନେ ଦାବି କରିଛନ୍ତି । ଗତ ୨୦୨୩ ବିଧାନସଭା ନିର୍ବାଚନରେ କଂଗ୍ରେସର ବିଜୟ ହେବା ପରେ ମୁଖ୍ୟମନ୍ତ୍ରୀ ପଦ ନେଇ କିଛି ଦିନ ଧରି ଚାଲିଥିଲା ବିବାଦ। ଶେଷରେ ଦିଲ୍ଲୀରେ ହୋଇଥିଲା ନିଷ୍ପତ୍ତି।
