ସଂଚାର ବ୍ୟୁରୋ: ଆସନ୍ତାକାଲି ଅର୍ଥାତ ନଭେମ୍ଵର ୧୩ ତାରିଖରେ ଝାଡଖଣ୍ଡ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ମତଦାନ । ମୋଟ ୮୧ଟି ବିଧାନସଭା ଆସନ ମଧ୍ୟରୁ ଆସନ୍ତାକାଲି ୪୩ଟି ଆସନରେ ମତଦାନ ସାବ୍ୟସ୍ତ କରିବେ ଭୋଟର । ପ୍ରଥମ ପର୍ଯ୍ୟାୟରେ ୧ କୋଟି ୩୭ ଲକ୍ଷ ଭୋଟର ୬୮୩ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ । ମତଦାନ ସକାଳ ୭ଟାରୁ ଆରମ୍ଭ ହୋଇ ସନ୍ଧ୍ୟା ୫ଟା ପର୍ଯ୍ୟନ୍ତ ଚାଲିବ । ଝାଡ଼ଖଣ୍ଡରେ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।
୧୫,୩୪୪ ବୁଥ ରହିଥିବା ବେଳେ ସେଥିରୁ ୨୨୫ଟି ସମ୍ଵେଦନଶୀଳ ବୁଥି ରହିଛି । ସମ୍ପୃକ୍ତ ଅଞ୍ଚଳରେ ୨ଶହରୁ ଅଧିକ କମ୍ପାନୀ ସୁରକ୍ଷା ବାହିନୀ ନିୟୋଜିତ ହୋଇଛନ୍ତି। ସମ୍ବେଦନଶୀଳ ବୁଥରେ ମତଦାନ ଅପରାହ୍ନ ୪ଟା ପର୍ଯ୍ୟନ୍ତ ହେବ । ଭାରତୀୟ ବାୟୁସେନା ହେଲିକପ୍ଟର ଯୋଗେ ଅଫିସର ସମ୍ଵେଦନଶୀଳ ପୋଲିଂ ବୁଥରେ ପହଞ୍ଚିସାରିଛନ୍ତି । ଅନେକ ହାଇପ୍ରୋଫାଇଲ୍ ନେତାଙ୍କ ଭାଗ୍ୟ ପରୀକ୍ଷା ହେବ । ଝାଡଖଣ୍ଡରେ ତଫସିଲଭୁକ୍ତ ଜନଜାତିଙ୍କ ପାଇଁ ସଂରକ୍ଷିତ ଥିବା ୨୮ଟି ଆସନ ମଧ୍ୟରୁ ୧୯ଟି ଆସନରେ ଆସନ୍ତାକାଲି ହେବ ମତଦାନ ।
ଗତ ନିର୍ବାଚନରେ ବିଜେପି ଜିତିଥିବା ୨୫ ଆସନ ମଧ୍ୟରୁ ୧୩ଟି ଆସନରେ ଆସନ୍ତାକାଲି ହେବ ଭୋଟଗ୍ରହଣ । ଗତ ନିର୍ବାଚନରେ ଏହି ୪୩ଟି ଆସନ ମଧ୍ୟରୁ ଜେଏମଏମ-କଂଗ୍ରେସ-ଆରଜେଡି ମେଣ୍ଟ ୨୬ଟି ଆସନ ଅକ୍ତିଆର କରିବାରେ ସଫଳ ହୋଇଥିଲା ।
ଜନଜାତିଙ୍କ ପାଇଁ ସଂରକ୍ଷିତ ଥିବା ୧୯ଟି ଆସନରୁ ୧୭ଟି ଜିତିଥିଲା ଏହି ମେଣ୍ଟ । ତେଣୁ ଏଥର ଏନଡିଏ ମେଣ୍ଟ ଏହି ଆସନ ବିଶେଷ କରି ଆଦିବାସୀଙ୍କ ଭୋଟ ଉପରେ ଅଧିକ ଗୁରୁତ୍ୱ ଦେଇଛି । ଅନୁସୂଚୀତ ଜାତି, ଜନଜାତି ଓ ପଛୁଆ ବର୍ଗଙ୍କ ଭୋଟ ହାତେଇବାକୁ ବିଜେପି ପ୍ରସ୍ତୁତ କରିଛି ରଣନୀତି । ଦ୍ୱିତୀୟ ପର୍ଯ୍ୟାୟ ମତଦାନ ଚଳିତ ମାସ ୨୦ ତାରିଖରେ ୩୮ଟି ନିର୍ବାଚନମଣ୍ଡଳୀରେ ଅନୁଷ୍ଠିତ ହେବ । ନଭେମ୍ବର ୨୩ରେ ଭୋଟ୍ ଗଣନା କରାଯିବ।
