ICCର ଚେୟାରମ୍ୟାନ ଭାବେ ପୁଣି ଥରେ ନିର୍ବାଚିତ ହୋଇଛନ୍ତି ଜୟ ଶାହ । ଏହା ତାଙ୍କର ଲଗାତାର ଦ୍ୱିତୀୟ କାର୍ଯ୍ୟକାଳ ହେବ । ବାଲିରେ ଅନୁଷ୍ଠିତ ICC ବୋର୍ଡ ବୈଠକରେ ସମସ୍ତ ଡାଇରେକ୍ଟର ଏକମତ ହୋଇ ତାଙ୍କ ନାମ ପ୍ରସ୍ତାବ ଦେଇଥିଲେ । ଅନ୍ୟ କୌଣସି ପ୍ରାର୍ଥୀ ନଥିବାରୁ ଜୟ ଶାହ ବିନା ବିରୋଧରେ ପୁଣି ଥରେ ଏହି ଗୁରୁତ୍ୱପୂର୍ଣ୍ଣ ପଦରେ ନିର୍ବାଚିତ ହୋଇଛନ୍ତି ।
ICC ସୂଚନା ମୁତାବକ, ବାଲିରେ ଅନୁଷ୍ଠିତ ବୋର୍ଡ ଓ କମିଟି ବୈଠକରେ ସମସ୍ତ ଡାଇରେକ୍ଟରଙ୍କ ପ୍ରସ୍ତାବ ପରେ ତାଙ୍କୁ ଦ୍ୱିତୀୟ କାର୍ଯ୍ୟକାଳ ପାଇଁ ନିର୍ବିରୋଧ ଭାବେ ଚେୟାରମ୍ୟାନ ଚୟନ କରାଯାଇଛି । ବିଶ୍ୱ କ୍ରିକେଟର ଏହି ଗୁରୁତ୍ୱପୂର୍ଣ୍ଣ ସମୟରେ ଖେଳର ବିଶ୍ୱବ୍ୟାପୀ ପ୍ରସାର, ପ୍ରଶଂସକଙ୍କ ସଂଖ୍ୟା ବୃଦ୍ଧି ଏବଂ ଆୟର ନୂଆ ଉତ୍ସ ସୃଷ୍ଟି କରିବା ଦିଗରେ ଏହି ନିଷ୍ପତ୍ତି ସହାୟକ ହେବ ।
ପୁନର୍ବାର ଚେୟାରମ୍ୟାନ ନିର୍ବାଚିତ ହେବା ପରେ ଜୟ ଶାହ କହିଛନ୍ତି, ICC ଚେୟାରମ୍ୟାନ ଭାବେ କାର୍ଯ୍ୟ କରିବା ତାଙ୍କ ପାଇଁ ଗର୍ବ ଓ ଏକ ବଡ଼ ଦାୟିତ୍ୱର ବିଷୟ । ବିଶ୍ୱସ୍ତରରେ କ୍ରିକେଟର ବିକାଶ ପାଇଁ ସେ ସମସ୍ତ ସଦସ୍ୟଙ୍କ ସହ ମିଶି କାମ କରିବେ । ବର୍ତ୍ତମାନ କ୍ରିକେଟ ଏକ ରୋମାଞ୍ଚକର ସମୟ ଦେଇ ଗତି କରୁଛି । ୨୦୨୮ ମସିହାରେ ଲସ୍ ଆଞ୍ଜେଲସ୍ ଅଲିମ୍ପିକ୍ସରେ କ୍ରିକେଟ ସାମିଲ ହେବା ଦ୍ୱାରା ନୂଆ ଦର୍ଶକଙ୍କ ନିକଟରେ ଏହି ଖେଳ ପହଞ୍ଚାଇବାର ଏକ ବଡ଼ ସୁଯୋଗ ମିଳିବ।
ସୂଚନାଯୋଗ୍ୟ, ୨୦୨୪ ମସିହାରେ ପ୍ରଥମ ଥର ପାଇଁ ICC ଚେୟାରମ୍ୟାନ ହୋଇଥିଲେ ଜୟ ଶାହ । ସେ ନ୍ୟୁଜିଲାଣ୍ଡର ଗ୍ରେଗ ବାର୍କଲେଙ୍କ ସ୍ଥାନ ନେଇଥିଲେ । ମାତ୍ର ୩୬ ବର୍ଷ ବୟସରେ ଏହି ପଦ ହାସଲ କରି ICCର ସବୁଠାରୁ କମ୍ ବୟସର ଚେୟାରମ୍ୟାନ ହେବାର ରେକର୍ଡ କରିଥିଲେ ଜୟ ଶାହ ।



