ଅଡ଼ୁଆରେ ମନ୍ମଥ ରାଉତରାୟ । ତାଙ୍କୁ ଗିରଫ କରିପାରେ ସାଇବର ଥାନା ପୋଲିସ। ତାଙ୍କ ନାଁରେ ଥାନରେ ଅଭିଯୋଗ କରିଛି ବିଜେପି IT ସେଲ୍ । ଏହି ଅଭିଯୋଗ ପରେ ତାଙ୍କର ଅଡ଼ୁଆ ବଢ଼ିଛି । କୌଣସି ବି ମୁହୁର୍ତ୍ତରେ ପୋଲିସ ତାଙ୍କୁ ଡାକିପାରେ ।
ନୂଆପଡ଼ା ନିର୍ବାଚନ ପୂର୍ବରୁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ଅରୁଚିକର ମନ୍ତବ୍ୟ ଦେଇଥିଲେ । ଯାହାକି ଏବେ ତାଙ୍କୁ ମହଙ୍ଗା ପଡ଼ିବାକୁ ଯାଉଛି । IT ଆକ୍ଟରେ ମାମଲା ରୁଜୁ କରି ତଦନ୍ତ କରୁଛି ଭୁବନେଶ୍ୱର ସାଇବର ଥାନା ପୋଲିସ।
ନୂଆପଡ଼ା ନିର୍ବାଚନ ବେଳେ ମନ୍ମଥଙ୍କର ଏକ ଭିଡିଓ ଭାଇରାଲ ହୋଇଥିଲା, ଯେଉଁଥିରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ଅପଶବ୍ଦ ବ୍ୟବହାର କରୁଥିବା ଦେଖାଯାଇଥିଲା । ରାସ୍ତାରେ ଲାଗିଥିବା ମୋଦିଙ୍କ ପୋଷ୍ଟର ସାମ୍ନାରେ ସେ ଛିଡ଼ା ହୋଇ ଏହି ଭିଡିଓ ସୁଟ କରିଥିଲେ ମନ୍ମଥ । କାହିଁକି ବିଜେପି କର୍ମୀ ବିଜୁ ବାବଙ୍କ ପ୍ରତିମୁର୍ତ୍ତି ଓ ବିଜେଡି ଫଟୋ ଆଗରେ ବିଜେପି ବ୍ୟାନର ଓ ମୋଦିଙ୍କ ଫଟୋ ଲଗାଇଛନ୍ତି ବୋଲି କହି, ସେ ପ୍ରଧାନମନ୍ତ୍ରୀଙ୍କୁ କଟୁ ଶବ୍ଦରେ ସମାଲୋଚନା କରିଥିଲେ ।
ଅନ୍ୟପଟେ ମନ୍ମଥ ରାଜନୀତିକୁ ଆସିବା ଦିନଠାରୁ ବିବାଦରେ ରହିଛନ୍ତି । ପ୍ରଥମେ ପାରିବାର ମଧ୍ୟରେ ଦୁଇ ଭାଇଙ୍କ କଳିକୁ ନେଇ ସେ ବିବାଦରେ ଥିଲେ । ତାପରେ ବହୁ ଚର୍ଚ୍ଚିତ ଅର୍ଚ୍ଚନା ନାଗ୍ଙ୍କ ସହ ତାଙ୍କର ଫଟୋ ମଧ୍ୟ ଭାଇରାଲ ହୋଇଥିଲା । ଏଥିପାଇଁ ମଧ୍ୟ ସେ ଖୁବ୍ ବିବାଦରେ ଫସିଥିଲେ । ତାପରେ ତାଙ୍କର ଦ୍ୱିତୀୟ ବିବାହ ପାଇଁ ମଧ୍ୟ ସେ ନାନା ସମାଲୋଚନାର ଶିକାର ହୋଇଥିଲେ ।
ଅନ୍ୟପଟେ ତାଙ୍କ ବାପା ତାଙ୍କୁ ନେଇ ଅସନ୍ତୁଷ୍ଟ ଥିବା କଥା ମଧ୍ୟ କହିଥିଲେ । ସେ ପ୍ରଥମେ କଂଗ୍ରେସରୁ ଲଢ଼ିବେ ବୋଲି ଚର୍ଚ୍ଚା ହେଉଥିଲା, ତାଙ୍କ ବାପା ସୁର ରାଉତରାୟ ମଧ୍ୟ ଏକଥା ସମସ୍ତଙ୍କ ଆଗରେ କହିଥିଲେ । କିନ୍ତୁ ପରେ ସେ ଏହାକୁ ଖଣ୍ଡନ କରିଥିଲେ ।
ଭୁବନେଶ୍ୱରରୁ ଲୋକସଭା ସାଂସଦ ପାଇଁ ସେ ବିଜେଡି ଟିକେଟରୁ ଲଢ଼ୁଥିଲେ । କିନ୍ତୁ ବହୁ ବ୍ୟବଧାନରେ ବିଜେପିର ଅପରାଜିତାଙ୍କଠାରୁ ହାରିଥିଲେ । ଏହି ସମୟରେ ମଧ୍ୟ ତାଙ୍କର ଖାମଖିଆଲ ମନ୍ତବ୍ୟ ପାଇଁ ସେ ଚର୍ଚ୍ଚାରେ ଥିଲେ । ତାଙ୍କ କ୍ୟାପ୍ଟେନ୍ ନାଁ ପାଇଁ ମଧ୍ୟ ତାଙ୍କୁ ଟ୍ରୋଲ କରାଯାଇଥିଲା । ଯୁବ କଂଗ୍ରେସର କିଛି ନେତା ତାଙ୍କୁ କ୍ୟାପ୍ଟେନ୍ ବଦଳରେ ଡ୍ରାଇଭର କହିଥିଲେ ।
ଯେତେବେଳେ ସେ ତାଙ୍କ ବଡ଼ ଭାଇ ସିଦ୍ଧାର୍ଥ ରାଉତରାୟଙ୍କ ବିଷୟରେ ଏଣୁତେଣୁ କହିବା ସହ ଅପଶବ୍ଦ ବ୍ୟବହାର କରିଥିଲେ, ସେତେବେଳେ ଅନେକ ମହଲରୁ ତାଙ୍କୁ କଟୁ ସମାଲୋଚନାର ଶିକାର ହେବାକୁ ପଡ଼ିଥିଲା ।
