ସଂଚାର ବ୍ୟୁରୋ: ବନ କର୍ମଚାରୀଙ୍କ ଉପରକୁ ଗୁଳି ଚାଳନା କଲେ ଶିକାରୀ। ମୟୂରଭଞ୍ଜ ଜିଲ୍ଲା ପୋଡାଡିହା ରେଞ୍ଜ ମନଭଙ୍ଗା ବିଟ ଅଞ୍ଚଳରେ ଚଢ଼ାଉ ସମୟରେ ଏଭଳି ଘଟଣା ଘଟିଛି । ଗତକାଲି ରାତିରେ ପୋଡାଡିହା ବନ ବିଭାଗ ଏବଂ ଏସଟିପିଏଫ ମିଳିତ ଭାବେ ମନଭଙ୍ଗା ବିଟ ଅଞ୍ଚଳରେ ଚଢ଼ାଉ କରିଥିଲେ। ଚଢାଉ ବେଳେ ୬ ଜଣ ଶିକାରୀ ଜଙ୍ଗଲ ଭିତରେ ରୋଷେଇ କରୁଥିବା ଦେଖିବାକୁ ପାଇଥିଲେ । ବନ କର୍ମଚାରୀଙ୍କୁ ଦେଖି ଶିକାରୀମାନେ ଦୁଇ ରାଉଣ୍ଡ ଗୁଳି ଚାଳନା କରି ଖସି ଯିବାକୁ ଚେଷ୍ଟା କରିଥିଲେ । ଏହାର ଜବାବରେ ଏସଟିପିଏଫ ମଧ୍ୟ ଫାଙ୍କା ଗୁଳିଚାଳନା କରିଥିଲା । ତେବେ ଘଟଣାସ୍ଥଳରୁ ଜଣେ ଶିକାରୀ ଗିରଫ ହୋଇଥିବା ବେଳେ ଗୋଟିଏ ଦେଶୀ ବନ୍ଧୁକ ଜବତ ହୋଇଥିଲା । ଗିରଫ ଶିକାରୀକୁ ପଚରା ଉଚରା କରିବା ପରେ ଅଶ୍ୱକୁଟି ଅଞ୍ଚଳରେ ଚଢ଼ାଉ କରି ଅନ୍ୟ ୩ ଜଣ ଶିକାରୀ ଏବଂ ଜଙ୍ଗଲରେ ଲୁଚାଇ ରଖିଥିବା ୩ ବନ୍ଧୁକକୁ ଜବତ କରିଛି ବନ ବିଭାଗ।୨ ଜଣ ଶିକାରୀ ଏବେ ବି ଫେରାର ରହିଛନ୍ତି।
