ସଂଚାର ବ୍ୟୁରୋ: ଶ୍ରୀଲଙ୍କାରେ ତାଣ୍ଡବ ସୃଷ୍ଟି କରିବା ପରେ ଘୂର୍ଣ୍ଣିଝଡ଼ ଡିଟୱା ଭାରତ ମୁହାଁଇଛି। ତାମିଲନାଡୁ, ପୁଡୁଚେରୀ ଏବଂ ନିକଟବର୍ତ୍ତୀ ଆନ୍ଧ୍ର ପ୍ରଦେଶରେ ଏହାର ପ୍ରଭାବ ଅନୁଭୂତ ହେଉଛି। ଆଜି ସନ୍ଧ୍ୟା ସୁଦ୍ଧା ସାମୁଦ୍ରିକ ଝଡ଼ ତୀବ୍ର ରୂପ ନେବା ସମ୍ଭାବନା ରହିଛି। ଡିଟୱା ପ୍ରଭାବରେ ଚେନ୍ନାଇରେ ବିମାନ ଚଳାଚଳ ବାଧାପ୍ରାପ୍ତ। ଚେନ୍ନାଇ ଏୟାରପୋର୍ଟରୁ ୮୨ଟି ବିମାନର ଉଡାଣ ବାତିଲ କରାଯାଇଛି। ଗତକାଲି ଚେନ୍ନାଇ ବିମାନବନ୍ଦରରୁ 35ଟି ବିମାନ ବାତିଲ କରାଯାଇଥିଲା। ଆଜିପାଇଁ ୪୭ଟି ବିମାନ ସ୍ଥଗିତ ରଖାଯାଇଛି।
ତାମିଲନାଡୁରୁ ରେଳ ଚଳାଚଳ ମଧ୍ୟ ପ୍ରଭାବିତ ହୋଇଛି। ଅନେକ ଟ୍ରେନ୍ ମଧ୍ୟ ବାତିଲ କରାଯାଇଛି। କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ବାତ୍ୟା ପାଇଁ ରେଳବାଇର ପ୍ରସ୍ତୁତିର ସମୀକ୍ଷା କରିଛନ୍ତି। ରେଳ ବୋର୍ଡ, ଜୋନ୍ ଏବଂ ଡିଭିଜନ ସ୍ତରରେ ମଧ୍ୟ ୱାର ରୁମ୍ ସକ୍ରିୟ କରାଯାଇଛି। ଚେନ୍ନାଇ ସମେତ ତାମିଲନାଡୁ ଏବଂ ପୁଡୁଚେରୀର ଅନେକ ଜିଲ୍ଲା ପାଇଁ ୟେଲୋ ଆଲର୍ଟ ଜାରି କରାଯାଇଛି। ଝଡ଼ବର୍ଷା ଏବଂ ବଜ୍ରପାତ ସହିତ ହାଲୁକାରୁ ମଧ୍ୟମ ବର୍ଷା ହୋଇପାରେ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ। ଉତ୍ତର ତାମିଲନାଡୁ ଏବଂ ପୁଡୁଚେରୀରେ ରେଡ୍ ଆଲର୍ଟ ଜାରି କରାଯାଇଛି।
ପୁଡୁଚେରୀ ଏବଂ କରାଇକାଲକୁ ବାଦ ଦେଇ ତାମିଲନାଡୁର କୁଡାଲୋର, ନାଗାପାଟ୍ଟିନାମ, ମାୟିଲାଡୁଥୁରାଇ, ଭିଲୁପୁରମ ଏବଂ ଚେଙ୍ଗଲପଟ୍ଟୁ ଜିଲ୍ଲାର କେତେକ ସ୍ଥାନରେ ପ୍ରବଳ ବର୍ଷା ହେବାର ପୂର୍ବାନୁମାନ କରିଛି ପାଣିପାଗ ବିଭାଗ। କୁଡାଲୋରରେ ରେଡ୍ ଆଲର୍ଟ ଜାରି କରାଯାଇଛି। କେନ୍ଦ୍ରଶାସିତ ଅଞ୍ଚଳ ପୁଡୁଚେରୀର ଉପକୂଳବର୍ତ୍ତୀ ଅଞ୍ଚଳରେ ଉଚ୍ଚ ଜୁଆର, ପ୍ରବଳ ପବନ ଏବଂ ବର୍ଷା ହେଉଛି। ଉଦ୍ଧାରକାର୍ଯ୍ୟ ଲାଗି ହାଇ ଆଲର୍ଟରେ ରହିଛନ୍ତି NDRF ଓ SDRF ଟିମ।
