ସଂଚାର ବ୍ୟୁରୋ: ବିଷ ବଳୟରେ ଜାତୀୟ ରାଜଧାନୀ ଦିଲ୍ଲୀ। ଖରାପ ହେବାରେ ଲାଗିଛି ଦିଲ୍ଲୀରେ ବାୟୁର ଗୁଣବତ୍ତା। ଅନେକ ଅଂଚଳରେ ବାୟୁର ଗୁଣବତ୍ତା ମାନ ୩୦୦ ପାର କରିଛି। ଦିଲ୍ଲୀ ଆନନ୍ଦ ବିହାର, ଅକ୍ଷରଧାମ ଅଂଚଳରେ AQI ୩୩୪ ରେକର୍ଡ ହୋଇଛି। ଦିଲ୍ଲୀର ଅନେକ ଅଂଚଳରେ ଧୂଆର ଚାଦର ଢାଙ୍କି ହୋଇ ରହିଥିବା ଦେଖିବାକୁ ମିଳିଥିଲା। ITO, ବିକାଜୀ କାମା ପେଲେସରେ ପ୍ରଦୂଷଣର ସ୍ତର ଅତି ଖରାପ ଏବଂ ଖରାପ ରହିଥିଲା। ଭିକାଜୀ କାମା ପେଲେସ ଅଂଚଳରେ ଏକ୍ଯୁଆଇ ୨୭୩ ଏବଂ ଆଇଟିଓ ଅଂଚଳରେ ୨୨୬ ରେକର୍ଡ ହୋଇଛି। ସେହିପରି ଇଣ୍ଡିଆ ଗେଟ୍ ଅଂଚଳରେ ବାୟୁର ମାନ ୨୫୧ ରେକର୍ଡ ହୋଇଛି। AQI ୩୦୦ ପାର କରିବା ପରେ ଏହା ବହୁତ ଖରାପ ସ୍ତରର ବୋଲି ବିବେଚନା ହୋଇଥାଏ। ବହୁଦିନ ଧରି ଏହି ଅବସ୍ଥା ଲାଗି ରହିଲେ ଅଧିକାଂଶ ଲୋକଙ୍କୁ ଶ୍ଵାସ ଜନିତ ସମସ୍ଯା ସ୍ଥିତିର ସାମନା କରିବାକୁ ପଡିପାରେ। ପ୍ରଦୂଷଣ ରୋକିବାକୁ କିଛି ଅଂଚଳରେ ପିଡବ୍ଲୁଡି ବିଭାଗ ପକ୍ଷରୁ ପାଣିର ସିଂଚନ କରାଯାଇଛି। ସେପଟେ ଦିଲ୍ଲୀରେ ଜମୁନା ନଦୀର ପାଣି ଦୁଷିତ ହୋଇଯାଇଛି। କାଳନ୍ଦୀ କୁଂଜ ଅଂଚଳରେ ଯମୁନା ନଦୀ ପାଣି ଉପରେ ଫେଣ ଭାସୁଥିବା ଦେଖିବାକୁ ମିଳିଛି। ସାରା ନଦୀର ପାଣିରେ ଏହି ଫେଣ ଭାସୁଛି। ଛଟ ପୂଜା ପୂର୍ବରୁ ଯମୁନା ନଦୀର ଅବସ୍ଥା ଖରାପ ହେବାରୁ ଲୋକଙ୍କ ଚିନ୍ତା ବଢିଛି । ପଡୋଶୀ ପଞ୍ଜାବ ଓ ହରିୟାଣାରେ ନଡ଼ା ଜାଳିବା ଘଟଣା ବଢୁଥିବାରୁ ଏହାର ପ୍ରଭାବ ଦିଲ୍ଲୀ ଉପରେ ପଡିବା ଦେଖାଯାଇଛି।
