ଦିଲ୍ଲୀରେ ବାୟୁ ପ୍ରଦୂଷଣ ସ୍ଥିତିରେ ସୁଧାର ଆସିବା ପରେ ହଟିଛି GRAP-3 କଟକଣା । ବାୟୁ ଗୁଣବତ୍ତା ପରିଚାଳନା ଆୟୋଗ (CAQM)ର GRAP ଉପ-କମିଟି ତୃତୀୟ ପର୍ଯ୍ୟାୟର କଟକଣା ହଟାଇବାକୁ ନିଷ୍ପତ୍ତି ନେଇଛି । ଦିଲ୍ଲୀର ବାୟୁ ଗୁଣବତ୍ତା ସୂଚକାଙ୍କ (AQI) ୨୦୪କୁ ଖସିବା ପରେ ଏହି ନିଷ୍ପତ୍ତି ନିଆଯାଇଛି । GRAP-3 ହଟିଥିଲେ ମଧ୍ୟ GRAP-1 ଓ GRAP-2 ଅନ୍ତର୍ଗତ ସମସ୍ତ କଟକଣା ବଳବତ୍ତର ରହିବ । ଏହାସହ ୩୦ ଅକ୍ଟୋବର ୨୦୨୬ର ନିର୍ଦ୍ଦେଶ ଅନୁଯାୟୀ ଲାଗୁ ହୋଇଥିବା କଟକଣା ମଧ୍ୟ ଜାରି ରହିବ ।
GRAP-3 ଲାଗୁ ହେବା ପରେ ଦିଲ୍ଲୀ-ଏନସିଆରରେ ଅନେକ କଟକଣା ଲାଗୁ କରାଯାଇଥିଲା । ଅତ୍ୟାବଶ୍ୟକ ନଥିବା ନିର୍ମାଣ କାର୍ଯ୍ୟ ଉପରେ ରୋକ୍ ଲଗାଯାଇଥିଲା । ପଞ୍ଚମ ଶ୍ରେଣୀ ପର୍ଯ୍ୟନ୍ତ ପିଲାଙ୍କ ପାଠପଢ଼ା ହାଇବ୍ରିଡ୍ ମୋଡରେ କରାଯାଉଥିଲା । ଅଭିଭାବକ ଓ ଛାତ୍ରଛାତ୍ରୀଙ୍କୁ ଅନଲାଇନ୍ ପାଠପଢ଼ାର ବିକଳ୍ପ ମଧ୍ୟ ଦିଆଯାଇଥିଲା ।
ସେହିପରି ଦିଲ୍ଲୀ ଓ ଏନ୍ସିଆରରେ BS-III ପେଟ୍ରୋଲ ଏବଂ BS-IV ଡିଜେଲ ଚାରିଚକିଆ ଯାନ ଚଳାଚଳ ଉପରେ କଟକଣା ଲାଗୁ ହୋଇଥିଲା । GRAP-3 ହଟିବା ପରେ ମଧ୍ୟ GRAP-2 ଅନୁଯାୟୀ କିଛି କଟକଣା ଜାରି ରହିବ ।
ଡାକ୍ତରଖାନା, ରେଳ ଷ୍ଟେସନ, ବିମାନବନ୍ଦର ଓ ଜରୁରୀକାଳୀନ ସେବାକୁ ଛାଡ଼ି ଏନସିଆର୍ରେ ଡିଜେଲ ଜେନେରେଟର ବ୍ୟବହାର ଉପରେ ରୋକ୍ ରହିବ । କେବଳ ଗ୍ୟାସ୍, PNG, LPG କିମ୍ବା ବାୟୋଗ୍ୟାସ୍ରେ ଚାଲୁଥିବା ଜେନେରେଟର ବ୍ୟବହାର କରାଯାଇପାରିବ । ହୋଟେଲ, ଢାବା ଓ ରେଷ୍ଟୁରାଣ୍ଟର ତନ୍ଦୁରରେ କୋଇଲା ଓ ଶୁଖିଲା କାଠ ବ୍ୟବହାର ଉପରେ କଟକଣା ଜାରି ରହିବ । କେବଳ ଗ୍ୟାସ୍ କିମ୍ବା ଇଲେକ୍ଟ୍ରିକ୍ ତନ୍ଦୁର ବ୍ୟବହାର ହେବ । ଖୋଲା ସ୍ଥାନରେ କଠିନ ଆବର୍ଜନା, ଶୁଖିଲା ପତ୍ର ଓ ପ୍ଲାଷ୍ଟିକ୍ ଜାଳିବା ଉପରେ ସମ୍ପୂର୍ଣ୍ଣ ରୋକ୍ ରହିବ । ନିୟମ ଉଲ୍ଲଂଘନ କଲେ ଜରିମାନା ଲାଗିବ ।



