ସଂଚାର ବ୍ୟୁରୋ: ଦିଲ୍ଲୀ ମହାନଗର ନିଗମର ୧୨ଟି ୱାର୍ଡରେ ଉପନିର୍ବାଚନ। କଡ଼ା ସୁରକ୍ଷାରେ ଚାଲିଛି ମତଦାନ। ଦିଲ୍ଲୀର ପ୍ରାୟ ୫୮୦ ବୁଥରେ ହେଉଛି ମତଦାନ। ଉପନିର୍ବାଚନରେ କିଏ ମାରିବେ ବାଜି ତାହାକୁ ନେଇ ଜାରି ରହିଛି ସସପେନ୍ସ। ଏହି ଉପନିର୍ବାଚନରେ ବିଜେପି ଓ ଆପ୍ ମଧ୍ୟରେ କଡ଼ା ଟକ୍କର ହେଉଛି। ଦିଲ୍ଲୀକୁ ବିଜେପି ହାତରୁ ପ୍ରାୟ ୨୭ ବର୍ଷ ପରେ ଛଡାଇ ଆଣି ଆପ ଶାସନକୁ ଆସିଥିଲା। ମାତ୍ର ଗତ ନିର୍ବାଚନରେ ଆପ୍ ଗାଦିଚ୍ୟୁତ ହୋଇଥିଲା। ଆପ୍ ନିଜକୁ ପୁଣି ଶକ୍ତିଶାଳୀ କରିବା ଲାଗି ପଦକ୍ଷେପ ନେଇଥିବାବେଳେ ଏହି ଉପନିର୍ବାଚନରେ ଦବଦବା କରିବା ଲାଗି ଆପ୍ ପ୍ରାଣମୂର୍ଚ୍ଛା ସଂଘର୍ଷ କରିଛି। ୧୨ଟି ଆସନ ଲାଗି ମୋଟ ୫୧ଜଣ ପ୍ରାର୍ଥୀ ମଇଦାନରେ ଅଛନ୍ତି। ସେମାନଙ୍କ ମଧ୍ଯରେ ମହିଳା ପ୍ରାର୍ଥୀ ଅଛନ୍ତି ୨୬। ବିଜେପିର ମହିଳା ପ୍ରାର୍ଥୀଙ୍କ ସଂଖ୍ୟା ୮ ହୋଇଥିବାବେଳେ ଆପର ୬ ଓ କଂଗ୍ରେସର ୫ଜଣ ଅଛନ୍ତି। ନିର୍ବାଚନ ପୂର୍ବରୁ ଆପର ୨ ଥରର ବିଧାୟକ ରାଜେଶ ଗୁପ୍ତା ବିଜେପିକୁ ଲମ୍ଫ ମାରିଥିବାରୁ ଆପକୁ ଏହା ଶକ୍ତ ଝଟକା ହୋଇଛି। ଆସନ୍ତା ୩ ତାରିଖରେ ହେବ ଗଣତି। ଏମସିଡିରେ ମୋଟ ୨୫୦ ୱାର୍ଡ ଥିବାବେଳେ ବିଜେପିର ସଂଖ୍ୟା ରହିଛି ୧୧୫। ମ୍ୟାଜିକ ନମ୍ବର ହେଉଛି ୧୨୫। ବର୍ତ୍ତମାନ ଆପର କାଉନସିଲରଙ୍କ ସଂଖ୍ୟା ରହିଛି ୯୯। କଂଗ୍ରେସର ଅଛନ୍ତି ମାତ୍ର ୬ କାଉନସିଲର। ଲୋକସଭା ଓ ବିଧାନସଭା ନିର୍ବାଚନରେ ଆପର ୩ଜଣ ଓ ବିଜେପିର ୯ ଜଣ କାଉନସିଲର ନିର୍ବାଚିତ ହୋଇଥିବାରୁ ଏହି ଉପନିର୍ବାଚନ ହୋଇଛି।
