ଲସ ଏଞ୍ଜେଲ୍ସ ଅଲିମ୍ପିକ୍ସ ୨୦୨୮ ଜରିଆରେ ୧୨୮ ବର୍ଷ ପରେ କ୍ରିକେଟ୍ ଅଲିମ୍ପିକ୍ସକୁ ପ୍ରତ୍ୟାବର୍ତ୍ତନ କରୁଛି । ଏଥିରେ ପୁରୁଷ ଓ ମହିଳା ବର୍ଗରେ ଛଅ ଛଅ ଟିମ୍ ସ୍ୱର୍ଣ୍ଣ ପଦକ ପାଇଁ ଲଢେଇ କରିବେ । ବୁଧବାର ଆୟୋଜକ ଏହାର ସୂଚନା ଦେଇଛନ୍ତି । ଏହା ପୂର୍ବରୁ ଶେଷ ଥର ୧୯୦୦ ମସିହାରେ ଆୟୋଜିତ ପ୍ୟାରିସ ଅଲିମ୍ପିକ୍ସରେ କ୍ରିକେଟକୁ ସାମିଲ କରାଯାଇଥିଲା । ସେହି ସମୟରେ ଫ୍ରାନ୍ସ ଓ ଗ୍ରେଟ ବ୍ରିଟେନ ଦଳ ଅଂଶଗ୍ରହଣ କରିଥିଲେ । ଏହି ଦୁଇ ଦଳ ମଧ୍ୟରେ ଦୁଇ ଦିନିଆ ମ୍ୟାଚ୍ ଖେଳା ଯାଇଥିଲା, ଯାହାକୁ ଅଣ ଆନୁଷ୍ଠାନିକ ଟେଷ୍ଟ ମ୍ୟାଚର ମାନ୍ୟତା ମିଳିଥିଲା ।
ଲସ ଏଞ୍ଜେଲ୍ସ ଅଲିମ୍ପିକ୍ସରେ କ୍ରିକେଟ୍ ଟି-୨୦ ଫର୍ମାଟରେ ଖେଳାଯିବ । ଏଥିରେ ପୁରୁଷ ଓ ମହିଳା ବର୍ଗର ଛଅ ଛଅ ଦଳ ଅଂଶଗ୍ରହଣ କରିବେ । ପ୍ରତ୍ୟେକ ଦଳ ୧୫ ଜଣିଆ ଟିମ୍ ଚୟନ କରିବେ । ତେବେ କେଉଁ ଆଧାରରେ ୬ଟି ଲେଖାଏଁ ଦଳ ଅଲିମ୍ପିକ୍ସ ଖେଳିବେ ତାହା ସ୍ପଷ୍ଟ ହୋଇ ନାହିଁ ।
ଆଇସିସିରେ ଆଫଗାନିସ୍ତାନ, ଅଷ୍ଟ୍ରେଲିଆ
ବାଂଲାଦେଶ, ଇଂଲଣ୍ଡ, ଭାରତ, ଆୟରଲାଣ୍ଡ, ନ୍ୟୁଜିଲାଣ୍ଡ, ପାକିସ୍ତାନ, ଦକ୍ଷିଣ ଆଫ୍ରିକା, ଶ୍ରୀଲଙ୍କା, ୱେଷ୍ଟଇଣ୍ଡିଜ ଓ ଜିମ୍ବାୱେ ୧୨ ପୂର୍ଣ୍ଣ ସଦସ୍ୟ ଦେଶ ସାମିଲ । ଏହା ବ୍ୟତୀତ ୯୪ ଦେଶ ଆସୋସିଏଟ ସଦସ୍ୟ ଭାବେ ସାମିଲ ।
ଅଲିମ୍ପିକ୍ସ ୨୦୨୮ ପାଇଁ କ୍ରିକେଟ୍ ଦଳ କେଉଁ ଆଧାରରେ କ୍ୱାଲିଫାଏ କରିବେ ତାର ସୂଚନା ଦିଆଯାଇ ନାହିଁ । ତେବେ ଆମେରିକା ଆୟୋଜକ ଦେଶ ହୋଇଥିବାରୁ ଆମେରିକା କ୍ରିକେଟ୍ ଟିମ୍ ସିଧାସଳଖ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରି ସାରିଛି । ବାକି ୫ଟି ଦଳ କ୍ୱାଲିଫିକେସନ ଜରିଆରେ ନିଜର ସ୍ଥାନ ସୁନିଶ୍ଚିତ କରିବେ ।
