ଆଇସିସି ଚାମ୍ପିୟନ୍ସ ଟ୍ରଫିର ସେମିଫାଇନାଲରେ ଅଷ୍ଟ୍ରେଲିଆକୁ ହରାଇ ଟିମ ଇଣ୍ଡିଆ ଫାଇନାଲରେ ପ୍ରବେଶ କରିଛି । ଟିମ୍ ଇଣ୍ଡିଆର ବିଜୟରେ ସମଗ୍ର ବିଶ୍ବରୁ ଭାରତୀୟ କ୍ରିକେଟ ପ୍ରେମୀ ଟିମ୍ ଏବଂ ରୋହିତ ଶର୍ମାଙ୍କୁ ଶୁଭେଚ୍ଛା ଜଣଶଉଛନ୍ତି । ଏହି ଭିତରେ ରୋହିତ ଶର୍ମାଙ୍କୁ ‘ମୋଟା’ କହୁଥିବା କଂଗ୍ରେସ ପ୍ରବକ୍ତା ଶାମା ମହମ୍ମଦ ମଧ୍ୟ ଟିମ ଇଣ୍ଡିଆକୁ ଏହି ବିଜୟ ପାଇଁ ଅଭିନନ୍ଦନ ଜଣାଇଛନ୍ତି । ସେ କହିଛନ୍ତି ଯେ, ମୁଁ ଫାଇନାଲ ମ୍ୟାଚକୁ ନେଇ ଖୁବ ଉତ୍ସାହିତ ଅଛି।
କଂଗ୍ରେସ ପ୍ରବକ୍ତା ଶାମା ମହମ୍ମଦ କହିଛନ୍ତି, “ମୋତେ ବହୁତ ଖୁସି ଲାଗୁଛି ଯେ, ରୋହିତ ଶର୍ମାଙ୍କ ଅଧିନାୟକତ୍ୱରେ ଅଷ୍ଟ୍ରେଲିଆର ବିପକ୍ଷ ସେମିଫାଇନାଲ ମ୍ୟାଚ ଜିତିଛି । ବିରାଟ କୋହଲିଙ୍କୁ ୮୪ ରନ କରିବା ପାଇଁ ଅଭିନନ୍ଦନ ଜଣାଉଛି । ମୁଁ ଫାଇନାଲ ମ୍ୟାଚ ଦେଖିବାକୁ ଖୁବ୍ ଉତ୍ସାହିତ ଅଛି।”
ଦୁବାଇରେ ଅଷ୍ଟ୍ରେଲିଆ ବିପକ୍ଷରେ ଭାରତର ୪ ୱିକେଟ୍ ବିଜୟ ସମୟରେ ଗୁରୁତ୍ୱପୂର୍ଣ୍ଣ ୮୪ ରନ୍ କରିଥିବାରୁ କଂଗ୍ରେସ ନେତା ଷ୍ଟାର ବ୍ୟାଟ୍ସମ୍ୟାନ୍ ବିରାଟ କୋହଲିଙ୍କୁ ମଧ୍ୟ ଅଭିନନ୍ଦନ ଜଣାଇଥିଲେ ।
ସୂଚନାଯୋଗ୍ୟ, ଗତ ଦୁଇଦିନ ତଳେ ଭାରତୀୟ ଅଧିନାୟକ ରୋହିତ ଶର୍ମାଙ୍କ ବିଷୟରେ X ରେ ପୋଷ୍ଟ କରି ଶାମା ମହମ୍ମଦ କହିଥିଲେ ଯେ, ଜଣେ ଖେଳାଳି ଭାବେ ସେ ଅଧିକ ଓଜନିଆ ଏବଂ ତାଙ୍କୁ ଓଜନ ହ୍ରାସ କରିବା ଆବଶ୍ୟକ । ସେ ହେଉଛନ୍ତି ଭାରତର ସବୁଠାରୁ ଖରାପ ଅଧିନାୟକ ।
କଂଗ୍ରେସର ପ୍ରବକ୍ତାଙ୍କ ଦ୍ୱାରା ରୋହିତ ଶର୍ମାଙ୍କ ଅପମାନକୁ ନେଇ ବିଜେପି ପ୍ରତିବାଦ କରିଥିଲା । ବିଜେପିର ମହିଳା ନେତା ରାଧିକା ଖେଡ଼ା ଲେଖିଥିଲେ ଯେ, କଂଗ୍ରେସ ପ୍ରବକ୍ତାଙ୍କ ଦ୍ୱାରା ରୋହିତ ଶର୍ମାଙ୍କ ବଡି ସେମିଂ କରିବା ଦୁଃସାହସ । କଂଗ୍ରେସ ଦଶନ୍ଧି ଧରି ଖେଳାଳିମାନଙ୍କ ଅପମାନ କରିଆସିଛି । ରୋହିତ ଶର୍ମା ବିଶ୍ବକପ ବିଜେତା ଅଧିନାୟକ । ହେଲେ ରାହୁଲ ଗାନ୍ଧି ନିଜ ପାର୍ଟିକୁ ସମ୍ଭାଳି ପାରୁନାହାନ୍ତି । କଂଗ୍ରେସ ପ୍ରବକ୍ତାଙ୍କୁ ଭାରତକୁ ଗୌରାବାନ୍ବିତ କରିଥିବା ବ୍ୟକ୍ତିଙ୍କୁ ଅପମାନ କରିବା ପରିବର୍ତ୍ତେ ପ୍ରଶଂସା କରିବା ସହତ ନିର୍ବାଚନ ଉପରେ ଧ୍ୟାନ ଦେବା ଉଚିତ ।
