କେନ୍ଦ୍ରୀୟ ମାଧ୍ୟମିକ ଶିକ୍ଷା ପରିଷଦ (ସିବିଏସ୍ଇ) ଦ୍ବାରା ପରିଚାଳିତ ଦଶମ ଶ୍ରେଣୀ ପରୀକ୍ଷା ଆଜିଠାରୁ ଆରମ୍ଭ ହୋଇଯାଇଛି। ପ୍ରଥମ ଦିନ ଇଂରାଜୀ ପରୀକ୍ଷା ରହିଛି। ଫେବ୍ରୁଆରି ୨୦ରେ ବିଜ୍ଞାନ, ୨୫ରେ ସୋସିଆଲ ସାଇନ୍ସ, ମାର୍ଚ୍ଚ ୧୦ରେ ଗଣିତ, ୧୩ରେ ହୋମ ସାଇନ୍ସ, ୧୮ରେ ଆଇଟି/କମ୍ପ୍ୟୁଟର ଆପ୍ଲିକେସନ ପରି ପ୍ରମୁଖ ବିଷୟର ପରୀକ୍ଷା ଅନୁଷ୍ଠିତ ହେବ। ଦେବଗଡ଼ସ୍ଥିତ କେନ୍ଦ୍ରୀୟ ବିଦ୍ୟାଳୟର ପ୍ରିନ୍ସପାଲ ଭଗବାନ ସାହୁ ଏହି ସୂଚନା ଦେଇଛନ୍ତି।
ଦ୍ୱାଦଶ ଶ୍ରେଣୀର ଫିଜିକାଲ ଏଜୁକେସନ ଆସନ୍ତା ୧୭ ତାରିଖ ଠାରୁ ଆରମ୍ଭ ହେବ। ଦ୍ବାଦଶ ଶ୍ରେଣୀର ଲିଖିତ ପରୀକ୍ଷା ଆସନ୍ତା ୨୧ ତାରିଖ ପଦାର୍ଥ ବିଜ୍ଞାନରୁ ଆରମ୍ଭ ହେବ। ୨୪ରେ ଭୂଗୋଳ, ୨୭ରେ ରସାୟନବିଜ୍ଞାନ, ମାର୍ଚ୍ଚ ୮ରେ ଗଣିତ, ୧୯ରେ ଅର୍ଥନୀତି, ୨୨ରେ
ରାଜନୀତିବିଜ୍ଞାନ, ୨୫ରେ ଜୀବବିଜ୍ଞାନ, ୨୬ରେ ଆକାଉଣ୍ଟାନ୍ସି, ୨୭ରେ ସାମାଜିକବିଜ୍ଞାନ, ଏପ୍ରିଲ ୧ରେ ଇତିହାସ, ୩ରେ ଗୃହବିଜ୍ଞାନ, ୪ରେ ମନସ୍ତତ୍ତ୍ବବିଜ୍ଞାନ ପରି ପ୍ରମୁଖ ବିଷୟର ପରୀକ୍ଷା ହେବ।
ଉଭୟ ଦଶମ ଓ ଦ୍ବାଦଶ ଶ୍ରେଣୀରେ ଦେଶର ପ୍ରାୟ ୪୪ ଲକ୍ଷ ଛାତ୍ରଛାତ୍ରୀ ପରୀକ୍ଷାରେ ସାମିଲ ହେଉଛନ୍ତି। ପରୀକ୍ଷା ପାଇଁ ସାରା ଦେଶରେ ୭,୮୪୨ଟି ପରୀକ୍ଷା କେନ୍ଦ୍ର କରାଯାଇଛି। ଦଶମ ଶ୍ରେଣୀରେ ଓଡ଼ିଶାରେ ପ୍ରାୟ ୩୦ ହଜାର ପରୀକ୍ଷାର୍ଥୀ ଥିବାବେଳେ ଦ୍ୱାଦଶ ଶ୍ରେଣୀରେ ୧୮ ହଜାର ପିଲା ନାମ ପଞ୍ଜୀକରଣ କରିଥିବା ସିବିଏସ୍ଇର ଭୁବନେଶ୍ବରସ୍ଥିତ ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି।
