ରାଜ୍ୟର ଅନ୍ୟତମ ଶକ୍ତିଶାଳୀ ସଂଘ ଓଡିଶା କ୍ରିକେଟ ଆସୋସିଏସନର ସଭାପତି ପଦରୁ ଅଚାନକ ଇସ୍ତଫା ଦେଇଛନ୍ତି ବବି ଦାସ । ଏ ନେଇ ସୂଚନା ଦେଇଛନ୍ତି ଓସିଏ ସମ୍ପାଦକ ସଂଜୟ ବେହେରା । ସଂଜୟଙ୍କ ସୂଚନା ଅନୁସାରେ, ବ୍ୟକ୍ତିଗତ କାରଣ ଦର୍ଶାଇ ପ୍ରଣବ ପ୍ରକାଶ ଦାସ ପଦ ଛାଡିଛନ୍ତି । ସଭାପତି ଭାବରେ ସେ ବେଶୀ ସମୟ ଦେଇପାରୁନଥିଲେ । ଶେଷରେ ବ୍ୟକ୍ତିଗତ କାରଣ ଦର୍ଶାଇ ପଦ ଛାଡିଛନ୍ତି ପ୍ରଣବ ପ୍ରକାଶ ଦାସ । ତେବେ ଚର୍ଚ୍ଚା ହେଉଛି ସରକାର ବଦଳିବା ପରେ ପ୍ରଣବ ପ୍ରକାଶ ଦାସ ଓସିଏ ସଭାପତି ପଦରୁ ଇସ୍ତଫା ଦେଇଛନ୍ତି ।
୨୦୨୨ ମସିହା ଅକ୍ଟୋବର ୨୮ ତାରିଖରେ ଓସିଏର ସଭାପତି ହୋଇଥିଲେ ପ୍ରଣବ ପ୍ରକାଶ ଦାସ । ସେ ସମୟରେ ନିର୍ବାଚନ ବି ଏକତରଫା ହୋଇଥିଲା । ନିର୍ଦ୍ବନ୍ଦରେ ସେ ନିର୍ବାଚିତ ହୋଇଥିଲେ । ଓସିଏ ସଭାପତିଙ୍କ କାର୍ୟ୍ୟକାଳ ୩ ବର୍ଷ ହୋଇଥିବାବେଳେ ୨ ବର୍ଷ ୨ ମାସରେ ହିଁ ପଦ ଛାଡିଛନ୍ତି ପ୍ରଣବ ପ୍ରକାଶ ଦାସ । ଏହାପରେ ନୂଆ ସଭାପତି କିଏ ହେବ ତାକୁ ନେଇ ଚର୍ଚ୍ଚା ବଢିଯାଇଛି । କୁହାଯାଉଛି, ବ୍ରହ୍ମଗିରିର ପୂର୍ବତନ ବିଧାୟକ ତଥା ବିଜେପି ନେତା ଲଳିତେନ୍ଦୁ ବିଦ୍ୟାଧର ମହାପାତ୍ର ରେସରେ ଆଗରେ ଅଛନ୍ତି । ଲଳିତେନ୍ଦୁ କ୍ରିକେଟ ଜଗତରେ ବି ବେଶ ନାଁ କରିଛନ୍ତି । ଓଡିଶା କ୍ରିକେଟ ଟିମରେ ସେ ଖେଳିବା ସହ କୋଚ, ଚୟନକର୍ତ୍ତା ରହିଛନ୍ତି । ଏହାଛଡା ଅନୁଗୁଳର ବିଜେପି ବିଧାୟକ ପ୍ରତାପ ପ୍ରଧାନଙ୍କ ନାଁ ବି ଚର୍ଚ୍ଚାରେ ରହିଛି । ସେ ଓସିଏର ସଦସ୍ୟ ଅଛନ୍ତି । ଏବେ ଓସିଏ ସାଧାରଣ ପରିଷଦ ବୈଠକରେ ପ୍ରଣବ ପ୍ରକାଶ ଦାସଙ୍କ ଇସ୍ତଫାକୁ ଗ୍ରହଣ କରାଯାଇଛି । ନିର୍ବାଚନ ଯାଏଁ ପଙ୍କଜ ଲୋଚନ ମହାନ୍ତି ଦାୟିତ୍ବ ସମ୍ଭାଳିବେ ।
