ସଂଚାର ବ୍ୟୁରୋ: ଭାଙ୍ଗ ବିକ୍ରି ଉପରେ ଲାଗିବ ବ୍ରେକ୍ । ଏଥର ନିଶାଦ୍ରବ୍ୟ ତାଲିକାରେ ଗଣାହେବ ଭାଙ୍ଗ । ଏନେଇ ଅବକାରୀ ବିଭାଗ ନିର୍ଦ୍ଦେଶନାମା ଜାରି କରିଛି । ବିଭାଗ ପକ୍ଷରୁ କୁହାଯାଇଛି ଯେ ଭାଙ୍ଗ ଖାଇବା ଦ୍ବାରା ମଣିଷ ବିଶୃଙ୍ଖଳା, ଶତ୍ରୁତା, ବିକୃତି, ମତିଭ୍ରମ ଓ ଚିନ୍ତାଶକ୍ତି ହରାଇଥାଏ । ତେଣୁ ଆଇନରେ ଥିବା ପ୍ରାବଧାନ ଓ କ୍ଷମତାକୁ ବ୍ୟବହାର କରି ରାଜ୍ୟ ସରକାର ଭାଙ୍ଗକୁ ମାଦକ ଦ୍ରବ୍ୟ ଭାବେ ଘୋଷଣା କରିଛନ୍ତି । ଏହାସହ ବିନା ଲାଇସେନ୍ସରେ ଭାଙ୍ଗ ବିକ୍ରି କଲେ ଅବକାରୀ ଆଇନ ଅନୁସାରେ ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ହେବ ବୋଲି ଅବକାରୀ କମିସନର କହିଛନ୍ତି ।
