ସଂଚାର ବ୍ୟୁରୋ: ଭାଲୁ ଆକ୍ରମଣରେ ବାପା ପୁଅ ମୃତ । ଏଭଳି ଅଘଟଣ ଘଟିଛି ଛତିଶଗଡ଼ କାଂକେର ଜିଲ୍ଲା ଡଙ୍ଗରକଟା ଗ୍ରାମ ନିକଟ ଜେଲାନକାସା ଜଙ୍ଗଲରେ । ମୃତକ ଦୁଇ ଜଣ ହେଲେ ସୁକଲାଲ ଡାରୋ ଓ ଶଙ୍କର ଡାରୋ । ଗତ ଶନିବାର ଦିନ ସକାଳେ ଡଙ୍ଗରକଟା ଗ୍ରାମର ସୁକଲାଲ ଡାରୋ ଏବଂ ଅଜୁ କୁରେଟି ଜଙ୍ଗଲକୁ କାଠ ସଂଗ୍ରହ କରିବାକୁ ଯାଇଥିଲେ । ଏହି ସମୟରେ ହଠାତ ଏକ ଭାଲୁ ସେମାନଙ୍କୁ ଆକ୍ରମଣ କରିଥିଲା । ଘଟଣାସ୍ଥଳରେ ସୁକଲାଲ ଡାରୋଙ୍କର ମୃତ୍ୟୁ ହୋଇଥିବା ବେଳେ ଅଜୁ କୁରେଟି ଖସି ଆସି ଗ୍ରାମବାସୀ ଓ ବନବିଭାଗକୁ ଜଣାଇଥିଲେ । ବନ ବିଭାଗ ଓ ପୋଲିସ ଟିମ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରୁଥିବା ବେଳେ ଭାଲୁଟି ପୁଣି ଆକ୍ରମଣ କରିଥିଲା।
ଆକ୍ରମଣରେ ସୁକଲାଲଙ୍କ ପିତା ଶଙ୍କର ଡାରୋଙ୍କ ମୃତ୍ୟୁ ହୋଇଥିଲା । ଏହାସହ ଫରେଷ୍ଟ ଗାର୍ଡ ନାରାୟଣ ଯାଦବ ମଧ୍ୟ ଆହତ ହୋଇଥିଲେ । ଏହି ଘଟଣାକୁ ଦୃଷ୍ଟିରେ ରଖି ଜଙ୍ଗଲରେ ବନକର୍ମଚାରୀ ନିୟୋଜିତ ରହିଛନ୍ତି । ଭାଲୁର କାର୍ଯ୍ୟକଳାପ ଉପରେ ନଜର ରଖିବାକୁ ନିର୍ଦ୍ଦେଶ ଦିଆଯାଇଛି । ଏହା ସହ ସ୍ଥାନୀୟ ଗ୍ରାମବାସୀଙ୍କୁ ଜଙ୍ଗଲକୁ ନଯିବାକୁ କଡା ନିର୍ଦ୍ଦେଶ ଦିଆଯାଇଛି।
