ଭାରତ ଟେଷ୍ଟ୍ ନୁହେଁ ବରଂ ଟି୨୦ ବିଶ୍ୱକପ୍ ଉପରେ ଲକ୍ଷ୍ୟ ରଖିଛି । ଗତ ଥର ରୋହିତ ଶର୍ମାଙ୍କ ନେତୃତ୍ୱରେ ଟିମ୍ ଇଣ୍ଡିଆ ଟି୨୦ ବିଶ୍ୱକପ୍ ଚାମ୍ପିଅନ୍ ହୋଇଥିଲା । ଏଥରେ ଦଳ ସୂର୍ଯ୍ୟ କୁମାର ଯାଦବଙ୍କ ନେତୃତ୍ୱରେ ଖେଳିବ । ଯାହା ଫେବ୍ରୁଆରୀ ୭ରୁ ଆରମ୍ଭ ହେବ । ଭାରତ ପ୍ରଥମେ ଆମେରିକା ବିପକ୍ଷରେ ଖେଳି ନିଜର ଅଭିଯାନ ଆରମ୍ଭ କରିବ । କିନ୍ତୁ ଏହା ପୂର୍ବରୁ ଆଉ ଏକ ଖବର ଚର୍ଚ୍ଚାର ବିଷୟ ପାଲଟିଛି।ଗୌତମ ଗମ୍ଭୀରଙ୍କୁ ନେଇ ଯେଉଁ ପ୍ରଶ୍ନ ଉଠୁଥିଲା ବର୍ତ୍ତମାନ ସେଥିରେ ପୂର୍ଣ୍ଣଚ୍ଛେଦ ପଡ଼ିଛି । BCCI ସିଧା ସିଧା ସ୍ପଷ୍ଟ କରିଦେଇଛନ୍ତି ଯେ ଗମ୍ଭୀର ରହିବେ । ଭାରତୀୟ ଦଳ ଟେଷ୍ଟ ଫର୍ମାଟରେ ଖରାପ ପ୍ରଦର୍ଶନ ପରେ ଗମ୍ଭୀରଙ୍କୁ ନେଇ ଅନେକ ପ୍ରଶ୍ନ ଉଠିଥିଲା । ତାଙ୍କୁ କୋଚ୍ ପଦରୁ ବିଦା କରିଥାନ୍ତା ବିସିସିଆଇ ।
ତାଙ୍କ ଜାଗାରେ ଭିଭିଏସ ଲକ୍ଷ୍ଣଣ ହେଇଥାନ୍ତେ ନୂଆ ଟେଷ୍ଟ୍ କୋଚ୍ । ଏମିତି କିଛି ଖବର ଗତ କିଛି ଦିନ ଧରି ହେଡ୍ ଲାଇନରେ ରହି ଆସିଛି । ହେଲେ ଏବେ ବିସିସିଆଇ ସବୁ ପ୍ରଶ୍ନର ଜବାବ ଦେଇଛି । ବୋର୍ଡର ଉପ ସଭାପତି ରାଜୀବ ଶୁକ୍ଳା ସମସ୍ତ ଖବରକୁ ଖଣ୍ଡନ କରିଛନ୍ତି । ସେ କହିଛନ୍ତି ଯେ, ଗମ୍ଭୀର ଭାରତର କୋଚ୍ ରହିବେ । ତାଙ୍କୁ ବିଦା କରାଯିବ ନାହିଁ । ଭାରତୀୟ ଟେଷ୍ଟ ଦଳରେ ସେ ପୂର୍ବ ପରି କୋଚ୍ ରହିବେ । ଏବେ ସେ ମୁଖ୍ୟ କୋଚ୍ ରହିଛନ୍ତି । ସେହିପରି ବିସିସିଆଇର ସଚିବ ଦେବଜିତ ସାଇକିଆ ମଧ୍ୟ ସମାନ କଥା କହିଛନ୍ତି । ଗୌତମଙ୍କୁ ଦାୟିତ୍ୱରୁ ଅବ୍ୟାହତି ଦେବା ପାଇଁ କୌଣସି ଯୋଜନା ନଥିବା ସେ ପ୍ରକାଶ କରିଛନ୍ତି ।
ଦେବଜିତ କହିଛନ୍ତି ଯେ, ଟେଷ୍ଟ ଫର୍ମାଟରେ କୌଣସି ପରିବର୍ତ୍ତନ ନେଇ ବୋର୍ଡ ଆଲୋଚନା କରିନାହିଁ । ଏବେ ଯାହା ଅଛି ଆଗକୁ ମଧ୍ୟ ସେମିତି ଚାଲିବ ।ଗଣମାଧ୍ୟମରେ ଭୁଲ ଖବର ବୁଲୁଛି । ଖବରରେ କୌଣସି ସତ୍ୟତା ନାହିଁ । ଏହା କେବଳ ଲୋକଙ୍କ କଳ୍ପନା । ଗମ୍ଭୀରଙ୍କ ଅଧୀନରେ ଭାରତୀୟ ଦଳ ଆଇସିସି ଚାମ୍ପିଅନ୍ସ ଟ୍ରଫି ଓ ଏସିଆ କପ୍ ଚାମ୍ପିଅନ ହୋଇଛି। ହେଲେ ଟେଷ୍ଟ କ୍ରିକେଟ୍ରେ ଦଳ ବିଫଳ ହୋଇଛି। ଗମ୍ଭୀରଙ୍କ କାର୍ଯ୍ୟକାଳ ମଧ୍ୟରେ ଭାରତ ସେନା ଦେଶ(ଅଷ୍ଟ୍ରେଲିଆ, ଇଂଲଣ୍ଡ, ଦକ୍ଷିଣ ଆଫ୍ରିକା ଓ ନ୍ୟୁଜିଲାଣ୍ଡ) ବିପକ୍ଷରେ ୧୦ଟି ଟେଷ୍ଟ ହାରି ସାରିଛି। ଆସନ୍ତା ୨୦୨୭ ଦିନିକିଆ ବିଶ୍ୱକପ୍ ସହ ଗମ୍ଭୀରଙ୍କ କାର୍ଯ୍ୟକାଳ ଶେଷ ହେବ । ହେଲେ ଦଳର ପ୍ରଦର୍ଶନକୁ ଆଧାର କରି ବିସିସିଆଇ ଯେକୌଣସି ମୁହୂର୍ତ୍ତରେ ତାଙ୍କ କାର୍ଯ୍ୟର ସମୀକ୍ଷା କରିପାରିବ ବୋଲି କୁହାଯାଉଥିଲା ।
ଗମ୍ଭୀରଙ୍କ ସମେତ ଚୟନ କମିଟି ଅଧ୍ୟକ୍ଷ ଅଜିତ ଅଗରକରଙ୍କ କାର୍ଯ୍ୟରେ ବିସିସିଆଇ ଅସନ୍ତୁଷ୍ଟ ଥିବା ସୂଚନା ମିଳିଛି । ତେଣୁ ଟେଷ୍ଟ ଓ ସୀମିତ ଓଭର କ୍ରିକେଟ୍ ପାଇଁ ୨ଜଣ ଭିନ୍ନ ଭିନ୍ନ କୋଚ ନିଯୁକ୍ତ କରିବାକୁ ପ୍ରସ୍ତାବ ଦିଆଯାଇଛି । ଇତି ମଧ୍ୟରେ ବିସିସିଆଇ ଭିଭିଏସ ଲକ୍ଷ୍ମଣଙ୍କ ସହ ଏ ବିଷୟରେ ଆଲୋଚନା କରିଥିବା ମଧ୍ୟ ଜଣାପଡ଼ିଥିଲା। ହେଲେ ଏଥିରେ କୌଣସି ପରିବର୍ତ୍ତନ ହେବାର ନାହିଁ। ଗମ୍ଭୀର ହିଁ ରହିବେ କୋଚ୍। କୌଣସି ପରିବର୍ତ୍ତନ ହେବାର ନାହିଁ।
