ସଂଚାର ବ୍ୟୁରୋ: ନବନିର୍ମାଣ କୃଷକ ସଂଗଠନ ତରଫରୁ ବରୀ ତହସିଲ ଘେରାଉ । ବାତ୍ୟା ‘ଦାନା’ ସମୟରେ ବରୀ ଅଞ୍ଚଳରେ ଫସଲ ନଷ୍ଟ ଯୋଗୁଁ ଚାଷୀମାନେ ବହୁତ କ୍ଷତି ସହିଛନ୍ତି । ସେପଟେ ବାତ୍ୟା ସମୟରେ ବରୀ ବ୍ଲକର ୪୦ଟି କେନ୍ଦ୍ରରେ ଥଇଥାନ ଏବଂ ରନ୍ଧାଖାଦ୍ୟ ଯୋଗାଣ ବାବଦକୁ ଅଠର ଲକ୍ଷରୁ ଅଧିକ ଟଙ୍କା ହଡ଼ପ ହୋଇଥିବା ଅଭିଯୋଗ ହୋଇଛି । ଏନେଇ ଭିଜିଲାନ୍ସ ତଦନ୍ତ ଦାବି କରି ନବନିର୍ମାଣ କୃଷକ ସଂଗଠନ ତରଫରୁ ଏକ ଦାବିପତ୍ର ଜିଲ୍ଲା ପ୍ରଶାସନକୁ ପ୍ରଦାନ କରାଯାଇଛି । ନବନିର୍ମାଣ କୃଷକ ସଂଗଠନର ରାଜ୍ୟ ସହ-ସଂଯୋଜକ ନିମାଇଁ ରାୟଙ୍କ ନେତୃତ୍ବରେ ଆଜି ଶହ ଶହ ଚାଷୀ ବରୀ – ବରୁହା ମୁଖ୍ୟ ରାସ୍ତା ଉପରେ ବସି ରହିଥିଲେ । ବରୀ ଥାନା ଅଧିକାରୀଣୀ ହସ୍ତକ୍ଷେପ କରିବା ପରେ ଚାଷୀମାନେ ରାସ୍ତା ଉପରୁ ହଟିଥିଲେ । ପରେ ପରେ ଚାଷୀମାନେ ବରୀ ତହସିଲ ଅଫିସ ପରିସରରେ ବିକ୍ଷୋଭ ପ୍ରଦର୍ଶନ କରିଥିଲେ ।
