ସଂଚାର ବ୍ୟୁରୋ: ଜେଲରୁ ବାହାରିଲେ ଡେରା-ସଚ୍ଚା-ସୌଦା ପ୍ରମୁଖ ରାମ ରହିମ୍ । ୨୧ ଦିନ ପାଇଁ ତାଙ୍କୁ ପା-ରୋଲ୍ ମିଳିଛି । ଆଜି ରୋହତକର ସୁନାରିୟା ଜେଲରୁ ବାହାରିଛନ୍ତି । ଜେଲ୍ରୁ ବାହାରିବା ପରେ ଆତ୍ମଘୋଷିତ ବାବା ରାମ୍ ରହିମଙ୍କ କାଫିଲା ଆରନାଓ୍ବା ଆଶ୍ରମ ଅଭିମୁଖେ ବାହାରିଛି । ବାବା ରାମ୍ ରହିମ୍ ପା-ରୋଲରେ ବାହାରିବା ନେଇ ଆବେଦନ ଦାୟର ହୋଇଥିଲା । ଏହା ଉପରେ ସରକାର ନିଷ୍ପତ୍ତି ନେବାକୁ କହିଥିଲେ କୋର୍ଟ । ତେବେ ଆଜି ତାଙ୍କୁ ପା-ରୋଲ୍ ମିଳିଛି।
କହିରଖୁଛୁ କି, ରାମ ରହିମଙ୍କୁ ୨୦୧୭ ଅଗଷ୍ଟ ମାସରେ ପଞ୍ଜକୁଲାର ସ୍ବତନ୍ତ୍ର ସିବିଆଇ କୋର୍ଟ ଦୁଇ ମହିଳାଙ୍କ ଦୁଷ୍କର୍ମ ମାମଲାରେ ଦୋଷୀ ସାବ୍ୟସ୍ତ କରିଥିଲେ । ୨୦୦୩ରେ ସିବିଆଇ ପଞ୍ଜବ ଏବଂ ହରିୟାଣା ହାଇକୋର୍ଟଙ୍କ ଆଦେଶରେ ଆତ୍ମଘୋଷିତ ବାବା ରାମ୍ ରହିମଙ୍କ ବିରୋଧରେ ମାମଲା ରୁଜୁ ହୋଇଥିଲା । କୁରୁକ୍ଷେତ୍ର ପୋଲିସ ଷ୍ଟେସନରୁ ମାମଲା ତଦନ୍ତ ପାଇଁ ସିବିଆଇ ହାତକୁ ଯାଇଥିଲା । ୨୦୧୭ରେ ତାଙ୍କୁ ଦୋଷୀ ସାବ୍ୟସ୍ତ କରି ସ୍ବତନ୍ତ୍ର କୋର୍ଟ ଦଣ୍ଡାଦେଶ ଶୁଣାଇ ଥିଲେ । ମହିଳାଙ୍କୁ ଦୁଷ୍କର୍ମ ମାମଲାରେ ତାଙ୍କୁ ୨୦ ବର୍ଷ ଜେଲଦଣ୍ଡ ମିଳିଛି ।
