ଭୁବନେଶ୍ୱର : ତିନି ଦିନ ଧରି ଅଚଳ ରହିବା ପରେ ଶେଷରେ ଶନିବାର ସ୍ୱାଭାବିକ ହୋଇଛି ଡାକ ସେବା । ଆଜି ସକାଳୁ ରାଜ୍ୟର ସମସ୍ତ ବଡ଼ ବଡ଼ ପୋଷ୍ଟ ଅଫିସ ଏବଂ ଜିପିଓରେ ଲିଙ୍କ୍ ସକ୍ରିୟ ହୋଇଥିବା ଦେଖିବାକୁ ମିଳିଛି । ଫଳରେ ଗ୍ରାହକମାନେ ଟଙ୍କା ଜମା ଏବଂ ଉଠାଣ କରି ପାରୁଛନ୍ତି ।
ତିନି ଦିନ ହେବ ଲିଙ୍କ୍ ଫେଲ୍ ଯୋଗୁଁ ଡାକ ସେବା ବାଧାପ୍ରାପ୍ତ ହୋଇଥିଲା । ଚେନ୍ନାଇ କିଛି କାର୍ଯ୍ୟ ଚାଲୁଥିବାରୁ ଅନଲାଇନ ଜରିଆରେ ଟଙ୍କା ନେଣଦେଣ ହୋଇ ପାରୁ ନଥିଲା । ଫଳରେ ଜରୁରୀ ପରିସ୍ଥିତିରେ ଟଙ୍କା ଉଠାଇବାକୁ କିମ୍ବା ଜମା କରିବାକୁ ଆସୁଥିବା ଲୋକମାନେ ନିରାଶ ହୋଇ ଫେରିଯାଉଥିଲେ ।
ଓଡ଼ିଶାରେ ୧୨୧୫ଟି ଡାକ କାର୍ଯ୍ୟାଳୟ ମଧ୍ୟରୁ କେବଳ ୩୦୦ଟି ଛୋଟ ଛୋଟ ଡାକ ଘରେ ସ୍ଥିତି ସ୍ୱାଭାବିକ ଥିଲା । ମାତ୍ର ବଡ଼ ବଡ଼ ଅଫିସ ଏବଂ ଜିପିଓରେ କୌଣସି ଅନଲାଇନ କାର୍ଯ୍ୟ ହୋଇ ପାରୁ ନ ଥିଲା । ଏମିତିକି ରସିଦ ମଧ୍ୟ ଦେଇ ହେଉ ନ ଥିଲା । କେବଳ ସ୍ପିଡ୍ ପୋଷ୍ଟ, ରେଜିଷ୍ଟ୍ରି ପୋଷ୍ଟ ଏବଂ ପାର୍ସଲ୍ ସେବାରେ କୌଣସି ଅସୁବିଧା ହୋଇ ନ ଥିଲା ।
ଡାକ ଘରକୁ ଭାରତ ସଞ୍ଚାର ନିଗମ ଲିମିଟେଡ୍ (ବିଏସଏନଏଲ୍) ଇଣ୍ଟରନେଟ୍ ସେବା ଯୋଗାଉଥିଲା । ମାତ୍ର କୌଣସି କାରଣ ପାଇଁ ବିଏସଏନଏଲ ଇଣ୍ଟରନେଟ୍ ସେବା ବନ୍ଦ କରି ଦେଇଥିଲା । ଫଳରେ ଏଭଳି ପରିସ୍ଥିତି ସୃଷ୍ଟି ହୋଇଥିଲା ।
